ގަން އިންޓަނޭޝަނަލް އެއާޕޯޓަކީ ރާއްޖޭގެ ދެކުނުގައި ކުރާ ވައިގެ ދަތުރުފަތުރުގެ ހަަބަކަށް ބަދަލުކުރާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.
ގއ، ގދ، އައްޑޫ އަދި ފުވައްމުލައް، ޝެޑިއުލް ވައިގެ ދަތުރުތަކަކުން ގުޅާލަން މިއަދު ފެށި "ސަދަން ކަނެކްޓިވިޓީ" އޮަޕަރޭޝަން އިފްތިތާހުކުރަން ގަމުގައި ބޭއްވި ރަސްމިއްޔާތުގައި އަމީން ވިދާޅުވީ މެދުއިރުމަތީގެ އެއާލައިނަކާއި ޗައިނާގެ އެއާލައިނެއް ގަމަށް އޮޕަރޭޓްކުރަން ސަރުކާރުން މަަސައްކަތް ކުުރަމުން އަންނަ ކަމަށެވެ. ބޮޑެތި ލުއިތަކެއް ދީގެން ނަަމެވެސް ގަން އިންޓަނޭޝަނަލް އެއާޕޯޓަށް އެއާލައިންތަކެއް ގެންނަން ޖެހޭ ކަމަށް ވެސް އޭނާ ވިދާޅުވި އެވެ.
"އިރާދަކުރެއްވިއްޔާ އަޅުގަނޑުމެން މި އެެއާޕޯޓްގެ ހާލަތު ބަދަލުކުރާނަން. ގޭން އިންޓަނޭޝަނަލް އެއާޕޯޓަކީ އެއާލައިންތައް އަންނަ، ރާއްޖޭގެ ވައިގެ ސަދާން ހަބް ކަމުގައި އިރާދަކުރެއްވިއްޔާ އަޅުގަނޑުމެން ހަދާނަން،" އަމީން ވިދާޅުވި އެވެ.
އޭނާ ވިދާޅުވީ ގަން އިންޓަނޭޝަނަލް އެއާޕޯޓަކީ ދުނިޔޭގެ ކޮމާޝަލް އެއާލައިންތަކުން އޮޕަރޭޓްކުރާ ހުރިހާ ސައިޒެއްގެ މަތިންދާބޯޓެއް އޮޕަރޭޓްކުރެވޭނެ ކެޕޭސިޓީ ހުރި އެއާޕޯޓެއް ކަމަށެވެ. ނަމަވެސް އެ އާޕޯޓަށް އެކަށީގެންވާ ވަރަށް އެއާލައިންތައް އޮޕަރޭޓްކުރުަމަށް ކުރަންޖެހޭ މަސައްކަތް މީގެ ކުރިން ކުރެވިފައި ނުވާ ކަމަށް ވެސް އޭނާ ވިދާޅުވި އެވެ.
"އަދި މީގެ އިތުރަށް، ޓުއަރިޒަމާ ގުޅުން ހުރި ކަންތައްތައް އެންމެ ރަނގަޅަަށް ހަމަޖެހިފައި ނެތުން. ނަމަވެސް އިރާދަކުރެއްވިއްޔާ މިއަދު އަޅުގަނޑުމެން މި އިފްތިތާހުކުރާ ، މިފަދަ އެއާ ކަނެކްޓިވިޓީގެ ވަސީލަތެއް ގާއިމްކުރެވުމުން، ފޯއްމުލައް، ހުވަދުއަތޮޅު އަދި އައްޑުއަތޮޅު ހިމެނޭހެން، ޓުއަރިޒަމްގެ ސްކޯޕް ބޮޑުވެގެންދާނެ،" އަމީން ވިދާޅުވި އެވެ.
ރައީސް ޑރ.މުަހައްމަދު މުއިއްޒު އެދިވަޑައިގަންނަވަނީ ހަމަ އެކަނި އެއާޕޯޓްތަކެއް އަޅަން ނޫން ކަމަށާއި އެމަނިކުފާނުގެ ތަސައްވުރަކީ އެހުރިހާ ވަސީލަތްތަކެއްގެ ބޭނުން ހިފައި ރައްޔިތުންގެ ދިރިއުޅުމަށް ފަސޭހަކަކަން ގެނެސްދިނުން ކަަމަށް ވެސް މިނިސްޓަރު ވިދާޅުވި އެވެ.
ދެކުނުގެ އަތޮޅުތަކުގެ ދެމެދުގައި ކުރާ ޝެޑިއުލް ދަތުރުތަކަށް ގައުމީ އެއާލައިން މޯލްޑިވިއަން އިން ތައާރަފްކުރީ ރާއްޖޭގައި މިހާރު ވެސް ފުޅާ ދާއިރާއެއްގައި ދޭ ސީޕްލޭން ހިދުމަތުގައި ބޭނުންކުރާ "ޓްވިން އޮޓާ" މަރުކާގެ ކުޑަ މަތިންދާބޯޓެއްގައި ފުރޮޅު ހަރުކޮށް، އެއާޕޯޓްތަކަށް އޮޕަރޭޓްކުރެވޭ ގޮތަށް ބަދަލުކޮށްގެންނެވެ.
އެ ހިދުމަތް ރަސްމީކޮށް ފަށަން މިއަދު އައްޑޫ ގަމުގައި ބޭއްވި ރަސްމިއްޔާތުގައި އައިލެންޑް އޭވިއޭޝަން ސާވިސަސް (އައިއޭއެސް)ގެ މެނޭޖިން ޑިރެކްޓަރު އިބްރާހީމް އިޔާސް ވިދާޅުވީ ގަން އިންޓަނޭޝަނަލް އެއާޕޯޓަކީ ބޭސްއެއްގެ ގޮތުގައި ބަލައިގެން ކުރިއަށް ގެންދާ އެ ދަތުރުތައް ހަފުތާގެ ހުރިހާ ދުވަހެއްގައި ވެސް ކުރާނެ ކަމަށެވެ. އެ ދަތުރުތައް ކުރާނީ އޭނާ ވިދާޅުވި ގޮތުގައި ދަތުުރުކުރާ އެންމެނަށް ބޮޑު ލުޔެއް ލިބޭނެ ގޮތަކަށެވެ.