ފުޓްބޯޅައިގެ މައި އިދާރާ، ފީފާއިން އެފްއޭއެމަށް ފޮނުވި ފައިސާ ލޯންޑާކުރަން އެހީތެރިވި މައްސަލައިގެ ތުހުމަތުވާ މުހައްމަދު އަގީލް، ތައިލެންޑުގެ ބެންކޮކުން ހައްޔަރުކޮށްފި އެވެ.
އެނގިފައިވާ ގޮތުގައި، އެފްއޭއެމްގެ ފައިނޭންޝަލް ޑިޕާޓްމަންޓްގެ ހެޑަކަށް ކުރިން އުޅުނު އަގީލް ހައްޔަރުކުރީ، ފިލައިގެން ބެންކޮކުގައި ދިރިއުޅެމުން ދަނިކޮށް މީގެ ހަފުތާއެއްހާ ދުވަސް ކުރިންނެވެ. އެކަމަކު، އޭގެ އިތުރު ތަފްސީލެއް އަދި ނުލިބެ އެވެ.
އަގީލްގެ މައްޗަށް ވަނީ މަނީ ލޯންޑްރިން އަށް އެހީތެރިވެދިން ކަމުގެ ދައުވާކޮށްފަ އެވެ. އެއީ، އަމިން އެވެނިއުގެ އެޕާޓްމަންޓް ހޯދައި ލިބިގަތުމަށާއި މަނީ ލޯންޑާކުރުމަށް ބައްސާމަށް އެހީތެރިވެދީފައިވާތީ އެވެ. ނަމަވެސް، ޝަރީއަތަށް ހާޒިރު ނުވާތީ އޭނާގެ އަޑުއެހުންތަކުގެ ބައި ވަނީ ވަކި ހިސާބަކުން ހުއްޓިފަ އެވެ.
ފީފާއިން ދިން ފައިސާއަށް ހިޔާނަތްތެރިވުމާއި މަނީލޯންޑާ ކުރުމުގެ ދައުވާތަކެއް ސާބިތުވެ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލު މިހާރު ވެސް އަންނަނީ 23 އަހަރުގެ ޖަލު ހުކުމެއް ތަންފީޒު ކުރަމުންނެވެ.
މިދިޔަ އަހަރުގެ ނޮވެމްބަރު މަހު ބޭއްވި އަޑުއެހުމެއްގައި މައްސަލަ ބައްލަވާ ގާޒީ ވަނީ އަގީލް ހައްޔަރުކޮށްގެން ކޯޓަށް ގެންނަން ފުލުހުންގެ މައްޗަށް އަމުރެއް ނެރެފަ އެވެ.