އައިޖީއެމްއެޗުގައި މަސައްކަތް ކުރަމުން އައި ފިލިޕީންސްގެ ނަރުހެއް ކަމަށްވާ މޭރީ ގްރޭސްގެ މަރުގެ މައްސަލާގައި ދައުވާ ލިބޭ އޭނާގެ ފިރިމީހާ މާވިން ވާގަސްގެ ދިފާއީ ހެކިންގެ ގޮތުގައި ހުށަހެޅި މީހުން ކޯޓަށް ހާޒިރުވާން ދެކޮޅު ހެދުމުން، އެ ހެކިވެރިންގެ ހެކިބަސް ނުނަގައި މައްސަލަ ކުރިއަށް ގެންދަން ނިންމައިފި އެވެ.
މޭރީއަށް މަރާލި މައްސަލާގައި މާވިންގެ މައްޗަށް، އެނގިހުރެ މީހަކު މެރުމުގެ ދައުވާ ކުރާއިރު، މާވިންއާ ލޯބީގެ ގޮތުން ގުޅިގެން އުޅުނު ކަމަށް ތުހުމަތު ކުރެވޭ ހަލީމަތު ލަމްހާގެ މައްޗަށް ވެސް އެކަމުގައި ބައިވެރިވުމުގެ ދައުވާ ދައުލަތުން ކުރެ އެވެ. މާވިން އާއި ލަމްހާގެ ޝަރީއަތް މިއަދު ކުރިއަށް ގެންދިޔައީ ވަކިވަކިންނެވެ.
ކްރިމިނަލް ކޯޓުގައި މާވިންގެ ޝަރީއަތުގެ އަޑުއެހުމެއް މިއަދު ބޭއްވީ އޭނާގެ ދިފާއީ ހެއްކެއްގެ ގޮތުގައި ހުށަހަޅާފައިވާ ފިލިޕީންސްގެ ފަސް މީހެއްގެ ހެކިބަސް ނެގުމަށެވެ. އެއީ މާވިންގެ "ގުޑް ކެރެކްޓާ" ސާބިތުކޮށްދޭން ހުށަހަޅާފައިވާ އޭނާ ދަންނަ އަދި އެކުވެރިންނެވެ.
ނަމަވެސް، އެ މީހުން ހެކިބަސް ދޭން ކޯޓަށް ހާޒިރެއް ނުވި އެވެ. އެކި ފަހަރު މަތިން އެ ހެކިވެރިންނަށް ގުޅައި، ކޯޓަށް ހާޒިރުވާން އެދި އަދި ކޯޓުން ޗިޓް ފޮނުވައިގެން ކުރި މަސައްކަތް ވެސް ކާމިޔާބެއް ނުވި އެވެ.
މާވިންގެ ދިފާއީ ހެކިން ކޯޓަށް ހާޒިރު ކުރަން އޭނާގެ ފަރާތުން މަސައްކަތް ކުރީ މާވިންގެ މަންމަ އެވެ.
މާވިންގެ ވަކީލް މިއަދު އަޑުއެހުމުގައި ވިދާޅުވީ، މަންމަ މެދުވެރިކޮށް އެ ހެކިވެރިން ކޯޓަށް ހާޒިރު ކުރެވޭނެ ކަމަކަށް ނުބެލެވޭނެ ކަމަށާއި އެހެންވެ، އެ ހެކިވެރިންގެ ހެކިބަސް ނުނަގާ މައްސަލަ ކުރިއަށް ގެންދަން އެދޭ ކަމަށެވެ.
އެހެންވެ، މައްސަލަ ބައްލަވާ ގާޒީ ނިންމެވީ އަންނަ މަހުގެ 14 ވަނަ ދުވަހަށް ހެއްކާ ގުޅޭ ގޮތުން ވާހަކަ ދެއްކުމަށާއި ހުލާސާ ބަޔާން އިއްވަން އަޑުއެހުމެއް ބާއްވާށެވެ.
މީގެ އިތުރުން ގާޒީ ވަނީ ވަކިން ކުރިއަށް ގެންދިޔަ މާވިން އާއި ލަމްހާގެ ޝަރީއަތް އެއްކޮށްލައި، ކުރިއަށް ގެންދަން ވެސް ނިންމައިފަ އެވެ. ލަމްހާގެ ބައިގައި ވެސް ހެކިބަސް ނެގުމުގެ މަރުހަލާ ނިމިފައިވާއިރު، ފެބުރުއަރީ 14 ވަނަ ދުވަހު ހުލާސާ ބަޔާން އިއްވަން އަޑުއެހުން އޮންނާނެ ކަން ގާޒީ އެންގެވި އެވެ.
މާވިންގެ ދިފާއީ ހެކިންގެ ގޮތުގައި ޖުމްލަ ފަސް ހެއްކެއް ހުށަހެޅިއިރު ހާޒިރުވީ އެންމެ ހެއްކެކެވެ. އެ ހެކިވެރިޔާއަކީ ރާއްޖޭގައި މަސައްކަތް ކުރާ ފިލިޕީންސްގެ މީހެކެވެ. ޝަރީއަތުގެ މަޖިލީހުގައި ހެކިބަސް ދެމުން އޭނާ ބުނެފައިވަނީ މާވިންއަކީ އެންމެންނާ ވެސް ވަރަށް ގުޅޭ، ހެޔޮ މީހެކެވެ. މާވިންއާ އެކުވެރިކަން ބާއްވަން އެންމެން ވެސް ބޭނުންވާނެ ކަމަށާއި އޭނާގެ ފަރާތުން އެ ސިފަ ފެންނަ ކަމަށް ހެކިވެރިޔާ ބުންޏެވެ.
އޮކްޓޫބަރު 2021 ގައި މޭރީގެ ބޮލާއި ކަރަށް ހަމަލާދީ ނޭވާ ހާސްކޮށްލައިގެން އޭނާ މަރާލި ކަމުގެ ތުހުމަތު މާވިންގެ މައްޗަށް ދައުލަތުން ކުރެ އެވެ. އަދި މޭރީ ދަންޖެހި މަރުވި ކަމަށް ބުނެ އައިޖީއެމްއެޗަށް ގެންދިއުމުން، އޭނާގެ ހަށިގަނޑާއި އޭނާ ދަންޖެހުނު ކަމަށް ބުނާ ތަން ފުލުހުން ބެލިއިރު ޝައްކުތަކެއް އުފެދުނެވެ.
އެ މައްސަލާގައި ފުލުހުން އެންމެ ފުރަތަމަ ހައްޔަރުކުރީ އައިޖީއެމްއެޗްގައި ނަރުހަކަށް އުޅުނު މާވިންނެވެ. އަދި ހޮސްޕިޓަލްގެ އީއާރްގައި ނަރުހަކަށް އުޅުނު ލަމްހާ ވެސް ފަހުން ހައްޔަރުކުރި އެވެ.
ދައުލަތުގެ ދައުވާގައި ބުނާ ގޮތުން މޭރީ މަރާލީ މާވިން އާއި ލަމްހާގެ ލޯބީގެ ގޮތުން ގުޅިގެން އުޅޭތީ އުފެދުނު މައްސަލަތަކެއްގެ ތެރެއިންނެވެ. ލަމްހާގެ މައްޗަށް ވަނީ މީހަކު މެރުމުގައި ބައިވެރިވުމާއި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދައުވާ އާއި އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާކުރެ އެވެ.