ޖިންސީ ފުރައްސާރަކުރި މައްސަލަ ސާބިތުވެ، އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) ގެ ވެރިޔާ، އިސްމާއިލް ސާޖިދު އެ މަގާމުން މިއަދު ވަކިކޮށްފި އެވެ.
އެނގިފައިވާ ގޮތުގައި، ސާޖިދު ފުރައްސާރަކުރިކަން ސާބިތުވާ ކަމަށް ނިންމީ، ޖިންސީ ފުރައްސާރައިގެ މައްސަލަ ބަލަން އެމްއެމްއޭ އިން އުފައްދާފައިވާ ކޮމިޓީންނެވެ. އެއާ އެކު، އޭނާ އެ މަގާމުން ވަކިކުރަން އެ ކޮމިޓީން ލަފާދިނެވެ.
އެހެންވެ، ކޮމިޓީގެ އެ ލަފާގެ މައްޗަށް ބުރަވެ، އެ ނިންމުން ތަންފީޒުކޮށް އެފްއައިޔޫގެ އިސްވެރިޔާގެ މަގާމުން ސާޖިދު ވަކިކުރީ ކަމަށް އެނގިފައި ވެ އެވެ.
އެފްއައިޔޫގެ އިސްވެރިޔާގެ މަގާމަށް ސާޖިދު އައްޔަންކުރެއްވީ މިދިޔަ އަހަރުގެ އޮގަސްޓް މަހު އެވެ. އެ ތުހުމަތާ ގުޅިގެން ސާޖިދު ސަސްޕެންޑުކުރީ މިދިޔަ ޑިސެމްބަރު މަހުގެ 30 ގަ އެވެ.
ސާޖިދު ކުރިން ވަނީ ޓެކްސް އެޕީލް ޓްރައިބިއުނަލުގެ މެންބަރުކަން ވެސް ކުރައްވައިފަ އެވެ.
އެފްއައިޔޫއަކީ މަނީ ލޯންޑްރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން މާލީ މުއާމަލާތްތަކަށް ފާރަވެރިވުމަށް އެމްއެމްއޭގައި އޮންނަ ޔުނިޓެކެވެ. އެތަނުގެ އިސްވެރިއަކަށް ބޭފުޅުން އައްޔަންކޮށް، ވަކިކުރުމުގެ ބާރު އޮންނަނީ ގަވަނަރުނަރަށެވެ.
މީގެ ކުރިން އެފްއައިޔޫގެ ހެޑްގެ މަގާމުގައި ހުންނެވި އަބްދުﷲ އަޝްރަފު ވެސް 2018 ވަނަ އަހަރު އެ މަގާމުން ވަކިކޮށްފައިވެ އެވެ.