ހއ. ބާރަށާއި ށ. ފުނަދޫ ޓޫރިސްޓު ހޮޓަލެއް ތަރައްގީކޮށް ހިންގާނެ ބަޔަކު ހޯދަން ޓޫރިޒަމް މިނިސްޓްރީން ރޭ އިއުލާންކޮށްފި އެވެ.
އެ މިނިސްޓްރީން ކުރި އިއުލާނުގައި ވަނީ ޓޫރިސްޓު ހޮޓަލެއް ތަރައްގީކޮށް، ހިންގަން ޝައުގުވެރިވާ ފަރާތްތަކުން އަންނަ މަހުގެ 23 ގައި ވާޗުއަލްކޮށް ބާއްވާ މައުލޫމާތު ދިނުމުގެ ބައްދަލުވުމުގައި ބައިވެރިވެވޭނެ ކަމަށެވެ.
އެއަށްފަހު، ބީލަން ހުށަހަޅަން އަންނަ މާޗު މަހުގެ ނިޔަލަށް ވަނީ ފުރުސަތު ދީފަ އެވެ.
މިނިސްޓްރީން ބުނީ އެ ދެ ރަށުގައި ވެސް ހަދަނީ 50 އެނދުގެ ޓޫރިސްޓް ހޮޓަލެއް ކަމަށެވެ.
ޓޫރިސްޓް ހޮޓާ އަޅަން ބާރަށުން 71،832 އަކަމީޓަރުގެ ބިމެއް އަދި ފުނަދޫއިން ތިން ހެކްޓަރުގެ ބިމެއް ވަނީ ކަނޑައަޅައިފަ އެވެ. އެ ދެ ތަން ކުއްޔަށް ދޭން ނިންމާފައިވަނީ 50 އަހަރަށެވެ.
ބާރަށުގެ ޓޫރިސްޓު ހޮޓާ އަޅަން ބިޑް ސެކިއުރިޓީ ގޮތުގައި 150،000 ޑޮލަރު (2.3 މިލިއަން ރުފިޔާ) އަދި ފުނަދުއަށް 100،000 ޑޮލަރު (1.5 މިލިއަން ރުފިޔާ) ދައްކަން ޖެހެ އެވެ.
އެއްބަސްވުމުގައި ސޮއިކުރާ ތާރީހުން ފެށިގެން ދެ އަހަރުގެ ތެރޭގައި ސިޓީ ހޮޓާ އަޅާ ނިންމަންޖެހެ އެވެ.