އެމްއައިބީ ގެސްޓްހައުސް އެވޯޑަށް ކުރިމަތިލުމުގެ ފުރުސަތު މިއަހަރުގެ ޖުލައި މަހު ހުޅުވާލަން ހަމަޖެހިފައިވާކަމަށް މިއެވޯޑުގެ މަސައްކަތްތައް އެމްއައިބީން ހަވާލުކޮށްފައިވާ ކްރޯ މޯލްޑިވްސްއިން ބުނެފި އެވެ.
މިއަދު މާގިރި ހޮޓެލްގައި އޮތް ނޫސްވެރިންގެ ބައްދަލުވުމުގައި ކްރޯ މޯލްޑިވްސްގެ މެނޭޖިން ޕާޓްނަރު ހަސަން މުހައްމަދު ވިދާޅުވީ މި އެވޯޑުގެ އިންޓެގްރިޓީ ކަށަވަރުކުރުމުގެ ގޮތުން މިނިވަން ޕާޓްނަރަކަށް މި އެވޯޑުގެ މަސައްކަތްތައް ހަވާލުކޮށް ކުރިއަށް ގެންދިއުމުގެ ގޮތުން އެވޯޑުގެ ހުރިހާ މަސައްކަތްތަކެއް ކްރޯއާ ހަވާލުކޮށްފައިވާ ކަމަށެވެ. އޭނާ ވިދާޅުވީ އެވޯޑުގެ ކެޓަގަރީތައް މިހާރު ކަނޑައަޅާފައިވާއިރު، ކެޓަގަރީތައް ކަނޑައެޅުމުގައި އިސްކަން ދިނީ މިއީ އިންވެސްޓަރުންނަށް ވެލިއު އެޑްކުރާ، މަނިޓައިޒްކުރެވޭ އެއްޗަކަށް ހަދަން ކަމަށެވެ. އެގޮތުން އަށް ދާއިރާއަކުން ގެސްހައުސްތަކަށް އެވޯޑު ދޭން ވަނީ ކަނޑައަޅައިފަ އެވެ.
ގެސްޓްހައުސްތަކުގެ އެވޯޑުގެ ކެޓަގަރީތައް:
- ސާވިސް އެކްސެލެންސް އެންޑް ހޮސްޕިޓާލިޓީ އެވޯޑު
- އޮތެންޓިކް މޯލްޑިވިއަން އެކްސްޕީރިއަންސް އެވޯޑު
- އައިލެންޑް އެކްސްކާޝަން އެންޑް އެކްސްޕީރިއަންސް އެވޯޑު
- ކަލިނަރީ އެކްސްޕީރިއަންސް އެވޯޑު
- އީކޯ ފްރެންޑްލީ އެވޯޑު
- ކޮމިއުނިޓީ އިމްޕެކްޓް އެވޯޑު
- ޑިޖިޓަލް ޕްރެޒެންސް އެވޯޑި
- އައިކޮނިކް މެރިން އެންޑް ޑައިވް އެކްސްޕީރިއަންސް އެވޯޑު
- ގެސްޓްހައުސް އިންޑަސްޓްރީގައި މަސައްކަތް ކުރާ ފަރާތްތަކަށް އެވޯޑު ދޭ ކެޓަގަރީތައް:
- ޓެލެންޓެޑް ކަލްޗާ ޗެމްޕިއަން އެވޯޑު
- ގެސްޓް އެކްސްޕީރިއަންސް ޗެމްޕިއަން އެވޯޑް
- އައުޓްސްޓޭންޑިން ޑައިވް ލީޑާ އެވޯޑު
ހަސަން ވިދާޅުވީ މި ކެޓަގަރީތަކަކީ ދާއިރާގައި ކުރިއަށް ދިއުމަށް މުހިންމު ކަންތައްތައް ކަމަށެވެ.
މި އެވޯޑަށް ހުށަހެޅުމުގެ ފުރުސަތު ހުޅުވާލަން ހަމަޖެހިފައި ވަނީ ޖުލައި 15ގަ އެވެ. ހަސަން ވިދާޅުވީ މި އެވޯޑަށް ކުރިމަތިލުމަށް މަހެއްހާ ދުވަހުގެ މުއްދަތު ލިބޭނެ ކަމަށެވެ. އަދި އެވޯޑު ކްރައިޓޭރިއާތައް އަންނަ ހަފްތާގެ ތެރޭގައި އިއުލާނުކުރާނެ ކަމަށް ވިދާޅުވި އެވެ.
މިއީ ނެޝަނަލް ހޮޓެލް އެންޑް ގެސްޓްހައުސް އެސޯސިއޭޝަނުން އެންޑޯސްކޮށްފައިވާ އެވޯޑެކެވެ. މި އެވޯޑު އެންޑޯޒްކޮށް، އެ ޖަމިއްޔާއިން ވަނީ އެކަމުގެ ލިޔުން އެމްއައިބީއާ ހަވާލުކޮށްފަ އެވެ.
އެމްއައިބީ ގެސްޓްހައުސް އެވޯޑު ދޭން ހަމަޖެހިފައި ވަނީ އެ ބޭންކުން ކޮންމެ އަހަރަކު ވެސް ބާއްވާ އެމްއައިބީ ގެސްޓްހައުސް ސިމްޕޯޒިއަމްގަ އެވެ. މި ސިމްޕޯޒިއަމް އޮންނާނީ އޮކްޓޯބަރު މަހު އެވެ. މިއީ ރާއްޖޭގައި ދޭ ފުރަތަމަ ގެސްޓް ހައުސް އެވޯޑެވެ.