މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ލޭ ހަދިޔާ ކުރުމުގެ ކޭމްޕެއް ބާއްވަން ނިންމައިފި އެވެ.
އެމްއޭސީއެލުން ބުނީ އެ ކޭމްޕަކީ މޯލްޑިވްސް ބްލަޑް ސާވިސް (އެމްބީއެސް)އަށް ލޭ ހަދިޔާކުރުމަށް ކުރިއަށް ގެންދާ ޕްރޮގްރާމެއް ކަމަށެވެ.
އެ ޕްރޮގްރާމް ކުރިއަށް ގެންދަން ނިންމާފައި ވަނީ އަންނަ ހޮނިހިރު ދުވަހާއި އާދިއްތަ ދުވަހެވެ.
ކޮންމެ އަހަރަކު ވެސް އެމްއޭސީއެލްގެ ސްޓާފުންނަށް ހުޅުވާލައިގެން ކުރިއަށް ގެންދާ ލޭ ހަދިޔާ ކުރުމުގެ ޕްރޮގްރާމް މި އަހަރު ކުރިއަށް ގެންދިއުމަށް ނިންމާފައި ވަނީ އެއާޕޯޓުގައި މަސައްކަތްކުރާ ދައުލަތުގެ އިދާރާތަކާއި މުއައްސަސާތަކާއި ކުންފުނިތަކުގެ އިތުރުން ރިސޯޓް މުވައްޒަފުންނަށް ވެސް ހުޅުވާލައިގެން ކަމަށް އެމްއޭސީއެލުން ބުންޏެވެ.
މިގޮތަށް ކޭމްޕް ބޭއްވުމުގެ މަގުސަދަކީ ލޭ ލިބުން ދަތިވެ، އެމްބީއެސް އިން އާންމުންގެ އެހީތެރިކަމަށް އެދިފައިވާތީ އާއި ކޮންމެ އަހަރެއްގެ ވެސް ރޯދަ މަހު ލޭ ލިބުން ދަތިވާތީ އެކަމަށް އެހީތެރިވުމަށް ކަމަށް ވެސް އެ ކުންފުނިން ބުންޏެވެ.
ލޭ ދިނުމަށް https://tinyurl.com/46y3p7m7 ލިންކު މެދުވެރިކޮށް ރަޖިސްޓްރީ ކޮށްގެން ހަދިޔާ ކުރެވޭނެ އެވެ.
ބްލަޑް ސާވިސް އިން ވަނީ ލޭ ލިބުން ދަތިވުމުން އާއްމުންގެ އެހީއަށް ވެސް އެދިފަ އެވެ. އެ އިދާރާއިން މިދިޔަ ބުރާސްފަތި ދުވަހު ސޯޝަލް މީޑިއާގައި ކުރި ޕޯސްޓުގައި ބުނީ ހުރިހާ ގްރޫޕެއްގެ ލޭ ވެސް ބޭނުންވާ ކަމަށެވެ.
ރަސްމީ ދުވަސްތަކުގައި ހެނދުނު 8:00 އިން ރޭގަނޑު 8:00 އާ ހަމައަށް ލޭ ހަދިޔާ ކުރެވޭނެ އެވެ.