ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްވަގުތެއްގައި ބާއްވާ ގޮތަަށް ގާނޫނު އަސާސީ ބަދަލުކުރަން ސަރުކާރުގެ ފަރާތުން ހުށަހަޅާފައިވާ ބިލަށް ސިޔާސީ ޕާޓީތަކުގެ ހިޔާލު ހޯދަން މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ނިންމައިފި އެވެ.
ދެ އިންތިހާބު އެއްކޮށްލާ ބިލަށް ޕާޓީތަކާއި އިލެކްޝަންސް ކޮމިޝަންގެ ހިޔާލު ހޯދުމަށާއި އެ ބިލަށް ލަފާ ހޯދަން އެޓާނީ ޖެނެރަލްގެ އޮފީހުގެ ބޭފުޅުންނާ އަންނަ ހޯމަ ދުވަހު ބައްދަލުކުރަން މިނިވަން މުއައްސަސާތަކުގެ ކޮމިޓީން ނިންމީ އެ ކޮމިޓީން މިއަދު ބޭއްވި ބައްދަލުވުމެއްގަ އެވެ.
ޕާޓީތަކާއި އީސީ އަދި އެޓާނީ ޖެނެރަލްގެ އޮފީހުގެ ހިޔާލު ހޯދަން މިއަދުގެ ކޮމިޓީ ބައްދަލުވުމުގައި ހުށަހެޅުއްވީ ބާރަށު ދާއިރާގެ ޕީއެންސީ މެންބަރު އިބްރާހީމް ޝުޖާއު އެވެ. އޭނާ ވިދާޅުވީ އެ ބިލަށް ޕާޓީތަކުގެ ހިޔާލު ހޯދަން ޖެހެނީ ރާއްޖޭގައި އޮތީ ގިނަ ޕާޓީތައް ބައިވެރިވާ ނިޒާމެއް ކަމަށްވާތީ ކަމަށެވެ.
"އޭގެ އިތުރުން، އިންތިހާބުތައް ބޭއްވުމަށް އަދާކުަރަންޖެހޭ ގާނޫނީ ހުރިހާ ޒިންމާތަކެއް މި އަދާކުރަނީ އިލެކްޝަންސް ކޮމިޝަނުން ކަމަށް ވާތީ އާއި ގާނޫނީ ގޮތުން ހުރި ކަންކަމާ މަޝްވަރާ ކުރުމަށް އަޅުގަނޑުމެން ބޭނުންވޭ،" ޝުޖާއު ވިދާޅުވި އެވެ.
ޝުޖާއުގެ އެ ހުށަހެޅުން ފާސްކުރީ ކޮމިޓީ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.
މިއަދުގެ ބައްދަލުވުމުގައި އެ ކޮމިޓީގެ މުގައްރިރު އަދި މާފުށި ދާއިރާގެ މެންބަރު ހުސައިން ރިޒާ ވިދާޅުވީ ދެ އިންތިހާބު އެއްކޮށްލަން ގާނޫނު އަސާސީއަށް ގެންނަ އިސްލާހުގެ ބިލަށް އާއްމުންގެ ހިޔާލު ހޯދަން ހުޅުވާލި ފުރުސަތުގައި ބައެއް ހިޔާލު ލިބިފައިވާ ކަމަށެވެ.
ބިލުގެ މަސައްކަތް މިމަހުގެ 15 ވަނަ ދުވަހާ ހަމައަށް ނިންމަން އެ ކޮމިޓީން ފުރަތަމަ ފާސްކުރި ނަމަވެސް އެ ތާރީހަށް ބިލުގެ މަސައްކަތް ނިންމާފައެއް ނުވެ އެވެ. އަދި އެ ބިލުގެ މަސައްކަތް މަޖިލީހުން ފެށީ މަަޖިލިސް ޗުއްޓީގައި އޮއްވާ ބޭއްވި ދައުރުން ބޭރުގެ ހާއްސަ ޖަލްސާއެއްގަ އެވެ.