ކ. ތިލަފުށީ ވޯކް ސައިޓެއްގައި ބިދޭސީއަކު މަރުވީ "ހިނގި ހާދިސާއެއްގައި" ކަމަށް ފުލުހުން ބުނެފި އެވެ.
ބަންގްލަދޭޝަށް މީހެއް ކަމަށްވާ އުމުރުން 24 އަހަރުގެ އަމީން މިއާ މަރުވެފައި އޮއްވައި އިއްޔެ ފެނުނީ ހޯމަ ދުވަހު އޭނާ ގެއްލިފައިވާ ކަމަށް ބުނެ އޭގެ އަނެއް ދުވަހު ކުރި ރިޕޯޓަކާ ގުޅިގެން ހޯދަމުން ދަނިކޮށެވެ.
ފުލުހުން މީޑިއާތަކަށް މައުލޫމާތު ދޭ ވަޓްސްއަޕް ގްރޫޕަށް ފޮނުވި މެސެޖުގައި ފުލުހުން ބުނީ މިހާތަނަށް ބެލިބެލުމުން، އޭނާ މަރުވި ހިނގި "ހާދިސާ" ހިނގީ ހޯމަ ދުަވަހުކަން އެނގިފައިވާ ކަމަށެވެ.
"މިހާތަނަށް ބެލި ބެލުމުން، އަމީން މިއާ ނިޔާވުމުގެ ހާދިސާ ހިނގާފައިވަނީ 2026 ޖެނުއަރީ 26 ވަނަ ދުވަހުކަން ވަނީ އެނގިފައެވެ." ފުލުހުންގެ މެސެޖުގައިވެ އެވެ.
ބިދޭސީ މީހާ މަރުވީ ކުނި ޖަމާކޮށްފައިވާ ތަނެއްގައި އެކްސްކަވޭޓަރަކުން މަސައްކަތްކުރަނިކޮށް، އޭގެ ދަތްގަނޑުން ޖެހި އަދި އެ މީހާގެ ގައިމައްޗަށް ކުނިތަކެއް އެޅިގެން ކަމަށް ބުނާ ވާހަކަތަކެއް ވަނީ ފެތުރިފަ އެވެ.
ބިދޭސީ މީހާ މަރުވީ "ހާދިސާއެއްގައި" ކަމަށް ފުލުހުން ބުނި ނަމަވެސް އެކަމާ ބެހޭ އެއްވެސް ތަފްސީލެއް ފުލުހުން އަދި ހާމައެއް ނުކުރެ އެވެ. އެހެންވެ މިއީ އެކްސިޑެންޓެއްގައި މަރުވި މީހެއް ކަމެއް ނުވަތަ ގަސްތުގައި މަރާލި މީހެއް ކަމެއް ވެސް އަދި ކަށަވަރެއް ނޫނެވެ.
ފުލުހުން ބުނީ ތަހުގީގު ކުރިއަށްދާ ވަރަކަށް މައުލޫމާތު ހިއްސާކުރާނެ ކަމަށެވެ.