ރާއްޖޭގެ ކަނޑުގެ އަޑިން ތެލާއި މިނެރަލް ހޯދުމުގެ މަސައްކަތް ކުރުމަކީ ތިމާވެއްޓަށް ގެއްލުން ވާނެ ބޮޑު ގޯހެއް ކަމަށް އެމްޑީޕީ ސަރުކާރުގެ އެންވަޔަރުމެންޓް މިނިސްޓަރު އައިމިނަތު ޝައުނާ މިއަދު ވިދާޅުވުމުން ފިޝަރީޒް މިނިސްޓަރު އަހުމަދު ޝިޔާމް އެކަމަށް ރައްދު ދެއްވައިފި އެވެ.
ސްޕެޝަލް އިކޮނޮމިކް ޒޯން(އެސްއީޒެޑް)ގައި ކުރެވޭ އެ ބާވަތުގެ މަސައްކަތްތައް ހިމަނުއްވައި ރައީސް ޑރ. މުހައްމަދު މުއިއްޒު ނެރުއްވި ގަރާރަށް އިސްލާހު ގެނެސް އިއްޔެ ވަނީ ތެލާއި ގޭހާއި މިނެރަލް އެކްސްޕްލޮރޭޝަން މަސައްކަތްތައް ހިމަނުއްވައިފަ އެވެ.
އެކަމާ ގުޅިގެން ޝައުނާ އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ކަނޑު މައިންކޮށްގެން ތެލާއި މިނަރަލް ހޯދޭ ގޮތަށް ގާނޫނު ބަދަލުކުރުމަކީ ވަރަށް ބޮޑު ކަންބޮޑުވުމެއް ކަމަށެވެ. އެއީ ކުރު ރާސްތާގެ ފައިދާއަކަށް ވިސްނައި، ހަދާ ވަރަށް ބޮޑު ގޯހެއްގެ ގޮތުގައި އޭނާ ސިފަ ކުރެއްވި އެވެ.
ޝައުނާގެ އެ ވާހަކަތަކާ ގުޅިގެން މިހާރުގެ ފިޝަރީޒް މިނިސްޓަރު ޝިޔާމް ވިދާޅުވީ، ރައީސް މުއިއްޒުގެ ސްޓްރެޓެޖިކް ޕްލޭނަކީ ރާއްޖޭގެ އިގްތިސާދު ހަމައެކަނި ޓޫރިޒަމާއި މަސްވެރިކަމަށް ބަރޯސާކޮށްފައި ބޭއްވުމުގެ ބަދަލުގައި ދިގު މުއްދަތަކަށް އޭގެ މަންފާ ކުރާނެ އިތުރު ކަންކަން ވެސް ކުރުން ކަމަށެވެ.
ޝިޔާމް ވިދާޅުވި ގޮތުގައި، މިވަގުތު ހަމައެކަނި އެ ދެ ދާއިރާ އަށް ބަރޯސާވެފައި އޮތުމުން، ދުނިޔޭގައި ކުރިމަތިވާ އެކި މައްސަލަތަކާ ގުޅިގެން ރާއްޖެ އަށް އަސަރުކުރާ މިންވަރު ބޮޑުވެ އެވެ. އަދި އިގްތިސާދު ފުޅާކުރުމަކީ އެ ރިސްކު ކުޑަކުރުން ކަމަށާއި ތެލާއި ގޭހާއި މިނެރަލް އެކްސްޕްލޮރޭޝަން މަސައްކަތްތައް އެސްއީޒެޑްގެ އިހުތިސާސްގެ ތެރޭގައި ހިމެނުމަކީ ދެމެހެއްޓެނިވި ގޮތެއްގައި އިގްތިސާދު ހަރުދަނާ ކުރުމަށް ކުރާ ކަމެއް ކަމަށް އޭނާ ވިދާޅުވި އެވެ.
ދުނިޔޭގެ އެންމެ ބޮޑު އެއް އެކްސްކްލޫސިވް އިކޮނޮމިކް ޒޯނެއް އޮތީ ރާއްޖޭގައި ކަމަށާއި އެކަމަކު ވެސް ރާއްޖެއިން އޭގެ ބޭނުންކުރަނީ މަސް ބޭނުމަށް އެކަނި ކަމަށް މިނިސްޓަރު ޝިޔާމް ވިދާޅުވި އެވެ.
ޝިޔާމް ވިދާޅުވީ ރާއްޖޭގެ މަސްލަހަތާ އެއްގޮތަށް، ގާބިލު އިންވެސްޓަރުންނާ ޕާޓްނާޝިޕް ހަދައިގެން ރާއްޖޭގެ ކަނޑުތަކުގެ ގާބިލުކަން ހޯދައި އެ ވަސީލަތްތައް ބޭނުންކޮށްގެން އާ މަގުތަކެއް ހުޅުވޭނެ ކަމަށެވެ.
"ކަނޑުގެ ގާބިލުކަން ފަރުވާތެރިކަމާ އެކު ހޯދައި ތަހުގީގު ކުރުމަކީ ދެމެހެއްޓެނިވި ގޮތެއްގައި ވަސީލަތްތައް ބޭނުން ކުރުމަށް އާ މަގުތަކެއް ހުޅުވިގެންދާނެ ކަމެއް،" އޭނާ ވިދާޅުވި އެވެ.
މޫސުމަށް އަންނަ ބަދަލުތަކުގެ ނާޒުކު އަސަރުކުރާ އެއް ގައުމަކީ ރާއްޖެ ކަމަށް ވާއިރު ޝިޔާމް ވަނީ ކަނޑުގެ ވަސީލަތްތައް ހޯދުމުގައި ކުރިއަށް ދާނީ ޓޫރިޒަމާ އެކު ކަމަށް ވިދާޅުވެފަ އެވެ. އަދި އެކަން ކުރާނީ އެކަމާ ގުޅިގެން ހަދަންޖެހޭ އެންވަޔަރުމަންޓަލް އިމްޕެކްޓް އެސެސްމެންޓްތަކާއި އެކަމާ ގުޅޭ ދިރާސާތައް ހަދައި ކަނޑުގެ ދިރުންތައް ހިޔާމަތްކޮށް، ދެމެހެއްޓެނިވި ގޮތެއްގައި ކަމަށް ވިދާޅުވި އެވެ.
ރާއްޖޭގެ އިގްތިސާދު ފުޅާކުރުމުން އޯޝަން ސްޓަޑީސް އާއި އަންޑަވޯޓާ އިންޖީނިއަރިން އަދި އެންވަޔަރަމަންޓަލް ސައިންސް ފަދަ ދާއިރާތަކުން ހުނަރުވެރި ވަޒީފާގެ ފުރުސަތުތައް ފަހިވާނެ ކަމަށް ވެސް މިނިސްޓަރު ވިދާޅުވި އެވެ. އަދި އާ ދާއިރާތަކަކުން ދިވެހިންނަށް ތަޖުރިބާ ލިބުމުގެ ފުރުސަތު ވެސް ފަހިވާނެ ކަމަށް ޝިޔާމް ވިދާޅުވި އެވެ.
ރާއްޖޭން ތެޔޮ ފެނޭތޯ ބެލުމަށް ކުރީގެ ރައީސް އަބްދުﷲ ޔާމީންގެ ވެރިކަމުގައި ދިރާސާއެއް ކުރި ނަމަވެސް އެ މަސައްކަތް ކާމިޔާބުވެފައެއް ނުވެ އެވެ. ނަމަވެސް ރާއްޖެ އިން މިނެރަލްއެއް ފެނޭތޯ މީގެ ކުރިން މަސައްކަތެއް ކުރިކަމެއް އެނގޭކަށް ނެތެވެ.