މޯބައިލް އެޕްލިކޭޝަނެއް މެދުވެރިކޮށް ޓެކްސީގެ ހިދުމަތް ދޭ ނަމަ، ޓެކްސީ ސެންޓަރުތަކުން ޓްރާންސްޕޯޓް މިނިސްޓްރީގެ ހާއްސަ ހުއްދައެއް ހޯދުން މިއަދު މަޖުބޫރުކޮށް، ގަވާއިދު އިސްލާހުކޮށްފި އެވެ.
ޓެކްސީ ގަވާއިދަށް ގެނައި އިސްލާހުތަކާ ގުޅިގެން މިނިސްޓްރީން ނެރުނު ނޫސްބަޔާނެއްގައި ބުނީ، ދަތުރުވެރިންގެ ރައްކާތެރިކަން ކަށަވަރުކުރުމަށްޓަކައި، މޯބައިލް އެޕްލިކޭޝަނެއް ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ހިދުމަތް ދޭން ބޭނުންވާ ފަރާތްތަކުން (ޓެކްސީ ސެންޓަރު ހިންގުމުގެ ލައިސަންސް އޮންނަ ފަރާތްތަކުން) މިނިސްޓްރީގެ ހާއްސަ ހުއްދައެއް ދެން ހޯދަން ޖެހޭނެ ކަމަށެވެ.
އެ ހުއްދަ ހޯދައިގެން ޑިޖިޓަލް ހިދުމަތް ދިނުމަކީ ހިދުމަތް ދޭ ޑްރައިވަރުން ޖަވާބުދާރީ ކުރުވުމަށް ލިބޭ ބާރެއް ކަމަށް މިނިސްޓްރީން ބުންޏެވެ.
އެ ގަވާއިދަށް ގެނައި އިތުރު ބަދަލުތަކަކީ؛
- ޓެކްސީ ސެންޓަރެއް ރަޖިސްޓްރީ ކުރުމަށްޓަކަައި ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް މަދުކުރުން. މިނިސްޓްރީން ބުނީ އޭގެ ސަބަބުން އާ ސެންޓަރުތައް އުފެދުމަށް ހުރި ހުރަސްތައް ކުޑަކުރެވި މާކެޓުގައި ވާދަވެރިކަން އުފެދ،ި އާންމުންނަށް ލިބޭ ހިދުމަތުގެ ފެންވަރު ރަނގަޅުވާނެ ކަމަށް.
- ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓަރީވެގެން މަސައްކަތް ކުރުމުގެ ފުރުސަތު އޮންނާނެ. މިނިސްޓްރީން ބުނީ އެ ބަދަލުގެ ސަބަބުން ޑްރައިވަރުންނަށް ލިބޭ އާމްދަނީ އިތުރުކުރުމަށް މަގުފަހިވާނެ ކަަމަށް.
- މިނިސްޓްރީން ބުނީ ކުންފުންޏަކުން ދަތުރުފަތުރުގެ ހިދުމަތް ދޭ ނަމަ، އެކަމަކީ އެ ކުންފުންޏެއްގެ މެންޑޭޓުގައި ހިމެނޭ ކަމެއްކަން ދެން ކަށަވަރު ކުރަން ޖެހޭނެ ކަމަށް. އަދި ގަވާއިދާ އެއްގޮތަށް ރަޖިސްޓަރީކޮށް ހުއްދަ ހޯދުން، ޓެކްސީގެ ހިދުމަތް ދޭ ކުންފުނިތަކަށް ދެން ލާޒިމްވާނެ ކަމަށް.
"މި ހުރިހާ ބަދަލުތަކެއްގެ މައިގަނޑު އަމާޒަކީ ފަސިންޖަރުންނާއި ހިދުމަތް ދޭ ފަރާތްތަކަ ށްވެސް މަންފާ ކުރާނެ، އިތުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ގާއިމުކުރުމެވެ،" މިނިސްޓްރީން ބުންޏެވެ.
ސަރުކާރުގެ ޓެކްސީ ލައިންގެ ހިދުމަތަށް ފަށަން ތައްޔާރުވަމުން އަންނައިރު، މިހާރު ވަނީ އެ ހިދުމަތަށް ބޭނުންވާ ޑްރައިވަރުން ހޯދުމުގެ މަސައްކަތް ފަށައިފަ އެވެ. ސަރުކާރުން ޓެކްސީގެ ވިޔަފާރި ފަށަން ނިންމީ ޓެކްސީގެ ހިދުމަތަށް 1،500 އެއްހާ ކާރު ރަޖިސްޓްރީކޮށްފައި އޮންނައިރު ވެސް، އެ ހިދުމަތް ހޯދުމުގައި އާންމުންނަށް ދަތިތަކާ ކުރިމަތިލާން ޖެހޭތީ، އެ މައްސަލައަށް ހައްލެއް ގެނައުމަށެވެ.
ޓްރާންސްޕޯޓް މިނިސްޓަރު މުހައްމަދު އަމީން ކުރިން ވިދާޅުވެފައިވާ ގޮތުގައި، އެންމެ ފުރަތަމަ ހިދުމަތަށް ނެރޭނީ 100 ކާރެވެ. އޭގެ ސަބަބުން ހެޔޮ ބަދަލެއް އަންނާނެ ކަމަށާއި އެ ޓެކްސީތަކުގެ ތެރޭގައި ހަނި ގޯޅިތަކަށް ވަދެވޭ ފަދަ ކުދި ޓެކްސީ ވެސް ހުންނާނެ ކަމަށް މިނިސްޓަރު ވިދާޅުވެފައިވެ އެވެ.
ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި، ސަރުކާރުގެ ޓެކްސީ ލައިންގެ ހިދުމަތް މި އަހަރު ކުރީކޮޅު ފަށާނެ އެވެ.