އައްޑޫ އިކުއަޓޯރިއަލް ހޮސްޕިޓަލުގައި ގާއިމްކުރި ކެތު ލެބު، ދޮޅު އަހަރު ފަހުން އިއްޔެ ހުޅުވައިފި އެވެ.
އެ ހޮސްޕިޓަލުން އޮންލައިންކޮށް ބޭއްވި ޕްރެސް ކޮންފަރެންސްގައި، ސީއީއޯ ޑރ. އިބްރާހިމް ޔާސިރު ވިދާޅުވީ ހިދުމަތް ފެށިތާ ދެ ދުވަސް ތެރޭގައި ހަތް މީހަކު ހިދުމަތް ހޯދާފައިވާ ކަމަށެވެ. އެއީ؛
- އެންޖިއޯ ގްރާމް: 4
- ސިކުނޑީގެ އެންޖިއޯ ގްރާމް: 1
- އެންޖިއޯ ޕްލާސްޓީ: 2
އެންޖިއޯ ގްރާމަކީ މައްސަލައެއް ހުރިތޯ ބެލުމަށް ހަދާ ޓެސްޓެކެވެ. އޭގެ އަސްލު ފަރުވާއަކީ އެންޖިއޯ ޕްލާސްޓީ އެވެ.
އައްޑޫގައި ކެތު ލެބު ގާއިމްކުރީ 2023 ގަ އެވެ. އޭގެ ފަހުން އެތަން ފެށުމަށް ކުރި މަސައްކަތަށް ފަހު، ދެ އަހަރެއްހާ ދުވަހުން ހުޅުވި ހިދުމަތް ދޭން ފެށުމަކީ ސަރަހައްދަށް ލިބުނު ކުރިއެރުމެއް ކަމަށް ހޮސްޕިޓަލުން ފާހަގަކުރެ އެވެ.
ޔާސިރު ވިދާޅުވީ އެ ލެބު ހުޅުވަން ފާއިތުވި މުއްދަތުގެ ތެރޭގައި ގިނަ މަސައްކަތްތަކެއް ކުރި ކަމަށެވެ. އޭގެ ތެރެއިން، ބޭރުގެ ބަޔަކާ ހަވާލުކޮށްގެން ވެސް އެ ސެންޓަރު ހިންގަން އުޅުނެވެ. އެކަމަކު، ފަހުން ނިންމީ އައިޖީއެމްއެޗްގެ ކާޑިއެކް ސެންޓަރާ ގުޅިގެން އައްޑޫ ކެތު ލެބުގެ ހިދުމަތް ފަށާށެވެ.
އޭނާ ވިދާޅުވި ގޮތުގައި އަލަށް ފެށި ފަރުވާއާއެކު ދެކުނުގެ ހުރިހާ އަތަޮޅަކަށް ވެސް ކެތު ލެބުގެ ފައިދާކުރާނެ އެވެ.
އެ ހޮސްޕިޓަލުގެ މެޑިކަލް ޑިރެކްޓަރު ޑރ. ފާތިމަތު އަމާނީ ނަސީރު ވިދާޅުވީ ހިތާ ގުޅުން ހުރި މައްސަލަތަކުގައި ހަފުތާއަކު ފަސްވަރަކަށް މީހުން މާލެއަށް ރެފަކުރާ ކަމަށެވެ. އެކަމަކު، ޓެސްޓު ހެދުމަށް ކުރަންޖެހޭ އެ ދަތުރަށް އާސަންދަ ނުލިބޭތީ އެއިން ކޮންމެ މީހަކު ވެސް މާލެއަށް ދަތުުރުކުރަން ބޮޑު ހަރަދެއް ކުރަންޖެހޭ ކަމަށް އޭނާ ވިދާޅުވި އެވެ.
"ބަލި މީހުން އަދި އާއިލާތަކަށް ވެސް ލުއިތަކެއް ވެގެންދާނެ. މިކޮޅުގައި ފެށި ހިދުމަތާއެކު ބަލި މީހުންގެ ރައްކާތެރިކަން ކަށަވަރުވާނެ،" އަމާނީ ވިދާޅުވި އެވެ.
އޭއީއެޗްގެ ޑިރެކްޓަރު ޝާހު ސައީދު ވިދާޅުވި ގޮތުގައި ކެތު ލެބުން ދެ ގޮތަކަށް ފަރުވާ ދޭނެ އެވެ.
ހިތުގެ ބައްޔަށް ޝައްކުވާ ހިސާބުން ޓެސްޓުކުރާނެ ދުވަހެއް ނިންމާނެ ކަމަށާއި އަދި އަވަހަށް ފަރުވާ ދޭންޖެހޭ ނަމަ އައްޑުއަށް ޑޮކްޓަރުން ފޮނުވައިގެން ނުވަތަ ބަލި މީހާއަށް އެންމެ ރަނގަޅީ މާލެ ގެނެސް ފަރުވާ ދީގެން ނަމަ އެ ގޮތަށް އަމަލުކުރާނެ ކަމަށް ޝާހު ވިދާޅުވި އެވެ.
މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ހަލީމް ވިދާޅުވީ ދިވެހިންގެ އަތްމަތީގައި ބާއްވައިގެން ސިއްހީ ހިދުމަތްތައް ފުޅާކުރަން ބޭނުންވާ ކަމަށެވެ. އައިޖީއެމްއެޗްގެ ޑޮކްޓަރުންނާއެކު އައްޑޫ ކެތު ލެބުގެ ފަރުވާ ފެށީ އެ ސަބަބުތަކާ ހެދި ކަމަށް އޭނާ ވިދާޅުވި އެވެ.
އައިޖީއެމްއެޗުގައި މަސައްކަތްކުރައްވާ ހިތުގެ ބަލިތަކުގެ ޑޮކްޓަރު، ޑރ. ޝަނީޒް ނަޒްމީ ވިދާޅުވީ ހިތުގެ ބަލިތަކަށް 2016 ގައި ހިދުމަތް ދޭން ފެށުމުގެ ކުރިން، ފަރުވާ ނުލިބިގެން ލޯ ކުރިމަތިން ބަޔަކު ވަކިވެގެން ދިޔަ މަންޒަރު ވެސް ފެނުނު ކަމަށެވެ.
އައްޑޫ އިން އެ ހިދުމަތް ލިބުމަކީ ބޮޑު އުފަލެއް ކަމަށާއި އެކަމުގެ ފައިދާ ގިނަ ބަޔަކަށް ލިބޭނެ ކަމަށް ޝަނީޒް ވިދާޅުވި އެވެ.
"ކޮމްޕްލިކޭޝަންތަކުން ބަލި މީހުން ސަލާމަތްކުރެވިގެންދާނެ" އޭނާ ވިދާޅުވި އެވެ.
ޝަނީޒް ވިދާޅުވި ގޮތުގައި އައްޑޫ ކެތު ލެބާއެކު، ހިތާ ގުޅުން ހުރި މައްސަލަތަކުން 60-70 ޕަސެންޓް ކޭސްތައް މާލެއިން ނުފޮނުވާ، އައްޑޫގައި ހުރެގެން ފަރުވާ ދެވޭނެ އެވެ.