ހދ. ކުޅުދުއްފުށީ ރީޖަނަލް ހޮސްޕިޓަލް (ކޭއާރުއެޗް)ގައި ޕްރައިވެޓް ރޫމް ފެސިލިޓީއެއް އަޅަން ހެލްތު މިނިސްޓްރީން ބަޔަކާ މިއަދު ހަވާލުކޮށްފި އެވެ.
ހެލްތު މިނިސްޓްރީގެ އިދާރާގައި މިއަދު މެންދުރުފަހު ބޭއްވި ރަސްމިއްޔާތެއްގައި ކޭއާރުއެޗުގައި ޕްރައިވެޓް ރޫމް، އައިސޮލޭޓް ކުރެވޭ ގޮތަށް ފެސިލިޓީއެއް އެޅުމަށް ހަވާލުކުރީ އަމިއްލަ ކުންފުންޏެއް ކަމަށްވާ އަލްޓެކް މޯލްޑިވްސް ޕްރައިވެޓް ލިމިޓެޑާ އެވެ.
މިނިސްޓްރީން ބުނި ގޮތުގައި އެ މަސައްކަތް ހަވާލުކުރީ؛
- 53.6 މިލިއަން ރުފިޔާއަށް
- އެއް އަހަރާއި ދެ މަސް ދުވަހުގެ ތެރޭގައި ނިންމާ ގޮތަށް
ހެލްތު މިނިސްޓްރީގެ ފަރާތުން އެ އެއްބަސްވުމުގައި ސޮއިކުރެއްވީ ސްޓޭޓް މިނިސްޓަރު ހަދީޖާ ޢަބްދުއްސަމަދު އަބްދުﷲ އެވެ. އަދި އަލްޓެކް މޯލްޑިވްސްގެ ފަރާތުން ސޮއި ކުރެއްވީ ޖެނެރަލް މެނޭޖަރު ހުސައިން ތަސްމީނެވެ.
މިނިސްޓްރީގެ ވެބްސައިޓުގައި ބުނީ އެ މަސައްކަތަށް ފަންޑު ކުރަނީ އޭޝިއަން އިންފްރާސްޓްޗާ އިންވެސްޓްމަންޓް ބޭންކް (އޭއައިއައިބީ) އިން ކަމަށެވެ. އަދި އެއީ އެ ބޭންކުން ރާއްޖޭގައި ކުރިޔަށް ގެންދާ ފުރަތަމަ ސްޓޭންޑް އެލޯން ޕްރޮޖެކްޓް ކަމަށް މިނިސްޓްރީން ބުންޏެވެ.
ކޭއާރުއެޗަކީ މާލެ ސަރަހައްދު ފިޔަވައި ރާއްޖޭގައި އެންމެ ގިނައިން ބަލި މީހުންނަށް ހިދުމަތްދޭ ހޮސްޕިޓަލް ކަމަށާއި އެގޮތުން ހއ. އަތޮޅާއި ހދ. އަތޮޅާއި ށ. އަތޮޅު، އަދިވެސް ކައިރި އެހެން އަތޮޅުތަކުގެ މީހުންނަށް އެތަނުން ހިދުމަތް ދެމުންދާ ކަމަށް މިނިސްޓްރީން ބުންޏެވެ.
މިވަގުތު އެ ހޮސްޕިޓަލަށް ހިދުމަތް ހޯދުމަށް ދާ މީހުން، އެޑްމިޓް ކުރަން ޖެހެނީ ވޯޑްގައި ކަމަށް ވާތީ، އެކި ރަށްރަށުން ދާ މީހުން ވޯޑުގައި އެޑްމިޓްކޮށްގެން ދިގު މުއްދަތަކަށް ހިދުމަތް ދޭން ޖެހޭ ހާލަތްތަކުގައި އެހީތެރިންނާއި ބަލި މީހުންނަށް ވެސް ދަތިތައް ދިމާވާ ކަމަށް މިނިސްޓްރީން ބުންޏެވެ.
މިނިސްޓްރީން ފާހަގަކުރި އިތުރު ބައެއް ކަންކަން
- ކޮވިޑް-19 ފަދަ ފަސޭހައިން ގައިން ގަޔަށް އަރާ ބަލިތަކުގެ ހާލަތްތަކުގައި ބަލި މީހާ އައިސޮލޭޓް ކުރެވޭނެ ހިދުމަތް އެ ހޮސްޕިޓަލުގައި މިހާރު ނެތް.
- ކޭއާރުއެޗަކީ މެޑިސިން ކިޔަވާ ކުދިންގެ ކޮމިއުނިޓީ މޮޑިއުލްސް އާއި އެ ނޫން ވެސް ސިއްހީ ދާއިރާގެ އެތައް ތަމްރީންތަކެއް ކުރިއަށް ގެންދާ މަރުކަޒެއް ނަމަވެސް، އެފަދަ ތަމްރީންތައް ކުރިއަށް ގެންދިޔުމަށް ހޮސްޕިޓަލްގެ ކޮންފަރެންސް ރޫމް ނުވަތަ ސަރުކާރުގެ އެހެން މަރުކަޒެއްގެ ހޯލެއް ނުވަތަ ހޮސްޕިޓަލްގެ ބޭރުން ތަނެއް ކުއްޔަށް ހިފަން ޖެހޭ.
- އެ ހޮސްޕިޓަލުގެ ދަށުން އަތޮޅު ތެރޭގެ މަރުކަޒުތަކުގެ މުވައްޒަފުންނާއެކު 700 އަށް ވުރެ ގިނަ މުވައްޒަފުން ބަލަހައްޓާއިރު، މުވައްޒަފުން ތަމްރީން ކުރާނެ ރަނގަޅު ވަސީލަތްތަކެއް މިވަގުތު ނެތް.
އާ ފެސިލިޓީގެ ތަފުސީލް
- އެ ފެސިލިޓީގައި 14 ޕްރައިވެޓް ރޫމް ހުންނާނެ. އެއީ ބަލި މީހުންނާއި އެހީތެރިންނަށް ތިބެވޭ ގޮތަށް
- ކޮންމެ ކޮޓަރިއެއްގައި ފާހާނާ ހުންނާނެ.
- މޮޑަރޭޓް ޕޭޝަންޓާއި ކްރިޓިކަލް ޕޭޝަންޓް އަދި ޕޭޝަންޓް ވިތު ސްޕެޝިއަލް ނީޑްއަށް ހާއްސަ ކޮޓަރިތައް ހުންނާނެ.
- އެ ފެސިލިޓީގައި ޕްރައިވެޓް ރޫމްގެ އިތުރުން ޑައިލިސިސް ރޫމާއި އެމަޖެންސީ ރޫމާއި މެޑިކަލް ސްޓޯރާއި ޖެނެރަލް ސްޓޯރާއި ނާސިން ސްޓޭޝަންސްތަކާއި އޮޓޯކްލޭވް ރޫމާއި އެޑްމިން ރޫމާއި ބްރީފިން ރޫމާއި ޔުޓިލިޓީ ރޫމާއި ސައި ކޮޓަރި އާއި ނަމާދު ކޮޓަރިއެއް ވެސް ހުންނާނެ.
- އެ ފެސިލިޓީގެ އިމާރާތުގެ ފުރަތަމަ ފަންގިފިލާގައި މަލްޓި-ޕާޕޯސް ހޯލެއް ހުންނާނެ.
މިނިސްޓްރީން ބުނީ އެ ފެސިލިޓީގެ މަސައްކަތް ނިމުމުން ރަށްރަށުން އެ ހޮސްޕިޓަލަށް ހިދުމަތް ހޯދަން ދާ މީހުންނަށް ވަރަށް ބޮޑު ލުއިފަސޭހައެއް ލިބޭނެ ކަމަށެވެ. އަދި ގައިން ގަޔަށް އަރާ ބަލީގެ ޕޭޝަންޓުން ވަކިން އައިސޮލޭޓްކޮށް، ހޮސްޕިޓަލުގެ އާންމު ހިދުމަތަށް ބުރޫނާރައި ހިދުމަތް ދެވޭނެ ކަމަށް މިނިސްޓްރީން ބުންޏެވެ.