ފަލަސްތީނުގެ ޣައްޒާއަށް އެއްގަމު މަގުން ތަކެތި ގެނެވޭ ގޮތަށް އޮތް ހަމައެކަނި މަގު ކަމަށްވާ، ރަފަހް ބޯޑަރު އަލުން ހުޅުވަން އެއްބަސްވެފައި ވާނީ އާންމުން ފައިމަގުގައި ދަތުރުކުރާ ގޮތަށް އެކަނި ކަމަށް އިޒްރޭލުން މިއަދު ބުނެފި އެވެ.
އިޒްރޭލުން ބުނީ ރަފަހް ބޯޑަރު މި ވަރަށް ހުޅުވާލާނީ ވެސް ހަމާސް އިން ގެންދިޔަ އިޒްރޭލު މީހުންގެ ތެރެއިން މިހާތަނަށް ހަވާލު ނުކުރާ ހަމައެކަނި މީހާގެ ހަށިގަނޑު ފެނުނު އިރަކުން ކަމަށެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ އިޒްރޭލުން އެއްބަސްވެފައި ވާނީ ފައިމަގުގައި ރަފަހް ބޯޑަރު ހުރަސްކޮށް ދަތުރުކުރެވޭ ގޮތަށް ކަމަށާއި އެގޮތަށް ދެވޭނީ ވެސް އިޒްރޭލު ސިފައިން ބަލައި ފާސްކޮށް ހުއްދަ ދިނުމުން ކަމަށެވެ.
"މިކަން ފެށޭނީ ހުރިހާ އަސީރުންގެ ހަށިތައް އިޒްރޭލާ ހަވާލުކޮށް ނިމި، އަދި އެންމެ ފަހު މީހާގެ ހަށިގަނޑު ހޯދުމުގައި ހަމާސްގެ 100 ޕަސެންޓް އެއްބާރުލުން ލިބުމުން،" ނަތަންޔާހޫގެ އޮފީހުން އެކްސްގައި ކުރި ޕޯސްޓެއްގައި ބުންޏެވެ.
ރަފަހް ބޯޑަރު އަލުން ހުޅުވާލައި އެހީގެ ސާމާނު ޣައްޒާއަށް ވެއްދޭނެ އިންތިޒާމް ހަމަޖެއްސުމަކީ ޣައްޒާގައި ހަމަލާތައް ހުއްޓާލަން އިޒްރޭލާއި ހަމާސްއާ ދެމެދު ވީ އެއްބަސްވުމުގައި ހިމެނޭ ކަމެކެވެ. އެކަމަކު އެއްބަސްވުމުގެ ދެ ވަނަ ފިޔަވަހި ތަންފީޒުކުރަން ފެށި އިރު ވެސް އިޒްރޭލުން ގެންދަނީ އެ މަގު ހުޅުވާލަން އިންކާރު ކުރަމުންނެވެ.
މީޑިއާ ރިޕޯޓްތައް ބުނާ ގޮތުގައި، ޣައްޒާގެ އެއްބަސްވުން ތަންފީޒުކުރުމާ ބެހޭ ގޮތުން އިޒްރޭލުގެ ވެރިންނާ މަޝްވަރާކުރަން ވަޑައިގެންނެވި އެމެރިކާގެ މަންދޫބުން ވަނީ މި ހަފްތާ ބަންދުގެ ނިޔަލަށް ރަފަހް ބޯޑަރު ހުޅުވަން އިޒްރޭލަށް ބާރުއަޅައިފަ އެވެ.
ބޯޑަރު ހުޅުވުމަކީ އެކި ގައުމުތަކުގެ ވެރިންނާއި އެހީގެ އެކި ޖަމާއަތްތަކުން ކެނޑިނޭޅި އެދެމުން އަންނަ ކަމެކެވެ. އެއީ އިޒްރޭލުން ދެ އަހަރު ވަންދެން ޣައްޒާއަށް ހަމަލާ ދެމުން ދިޔަ އިރު މުޅި ޣައްޒާ ހިސާރުކޮށްފައި އޮތުމުން ކާބޯތަކެއްޗާއި އަސާސީ ހުރިހާ ތަކެއްޗެއް އެތަނުން ހުސްވެ ހައިހޫނު ކަމުގައި ދެ މިލިއަނެއްހާ މީހުން އުޅެން ޖެހިފައިވާ މައްސަލައަށް އަވަސް ހައްލެއް ގެނެސް އާންމު ހާލަތު ރަނގަޅު ކުރުމަށެވެ.
ރިޕޯޓްތައް ބުނާ ގޮތުގައި މިހާރު ހަވާލުކޮށް އޮތް ހަށިގަނޑު ހޯދުމަށް އިޒްރޭލުން ދަނީ ގަބުރުސްތާނެއް ފާސްކުރަމުންނެވެ. އެއީ އެ ހަށިގަނޑު އޮންނާނެ ކަމަށް ހަމާސް އިން ދިން މައުލޫމާތަށް ބިނާކޮށް ބަލަމުން އަންނަ ތަނެއް ކަމަށް އެ ޖަމާއަތުން ބުނެފައިވެ އެވެ.
ހަމާސް އިން ވަނީ، ހަމަލާ ބަދަލުކުރުމުގެ އެއްބަސްވުމުގެ ދަށުން، އެންމެ އަސީރެއްގެ ހަށިގަނޑު ނޫން ހުރިހާ ހަށިތަކާއި ދިރިތބި ހުރިހާ އަސީރުން ވެސް އިޒްރޭލާ ހަވާލުކޮށްފަ އެވެ.
އިޒްރޭލުން ޣައްޒާގައި އޮކްޓޫބަރު 7، 2023 އިން ފެށިގެން މިހާތަނަށް 71،660 މީހުން ޝަހީދުކޮށްލާފައިވާ ކަމަށް ޣައްޒާގެ ހެލްތު މިނިސްޓްރީން ބުނެފައިވެ އެވެ.