ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މުވައްޒަފުންގެ މި އަހަރުގެ ބޯނަސްގެ ގޮތުގައި ދޭނެ އެންމެ ބޮޑު އަދަދަކީ 18،600ރ. ކަމަށް ކަނޑައަޅައިފި އެވެ.
އެ ކުންފުނީގެ އިސްވެރިއަކު މިއަދު ވިދާޅުވީ، ބޯނަސް ފައިސާ ދޫކުރަނީ ކުންފުނީގެ ބޯޑުން ފާސްކޮށް ފިނޭންސް މިނިސްޓްރީގެ ހުއްދައާ އެކު ކަމަށެވެ.
އެޗްޑީސީގެ އޮފިޝަލް ވިދާޅުވި ގޮތުގައި، އަހަރީ ބޯނަސް ދޫކުރަނީ މި އަހަރުގެ ތެރޭގައި އެ މުވައްޒަފަކު ހިދުމަތްކުރި މުއްދަތަކަށް ރިއާޔަތްކޮށްފަ އެވެ. އެހެންވެ، 18،600ރ. އަކީ އެންމެ ގިނައިން ލިބޭނެ މުވައްޒަފުންނަށް ޖެހޭނެ އަދަދެވެ.
"އެހެންވީމާ ހުރިހާ މުވައްޒަފުންނަކަށް 18،600ރ. އެއް ނުލިބޭނެ. ސާވިސް ޕީރިއަޑަށް ބަލާފައި ބޯނަސް ދޭނީ. އެކި ވަރަށް އެކި މުވައްޒަފުންނަށް ލިބޭނީ،" އޭނާ ވިދާޅުވި އެވެ.
މިދިޔަ އަހަރު އެޗްޑީސީގެ މުވައްޒަފުންގެ އަހަރީ ބޯނަސްގެ ގޮތުގައި ކަނޑައެޅީ 10،000ރ. އެވެ.
ދައުލަތުގެ ކުންފުނިތަކުން އެ ކުންފުންޏެއްގެ މާލީ ހާލަތަށް ރިއާޔަތްކޮށް ކޮންމެ އަހަރަކު ވެސް އަހަރީ ބޯސް އާންމުކޮށް ދޫކުރެ އެވެ.