ހދ. ކުޅުދުއްފުށީގެ ބޮޑެތި މަގުތައް ހެދުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާ، އަދި އެ ރަށު އެއާޕޯޓުގެ ޓާމިނަލް އިތުރަށް ތަރައްގީކުރުމުގެ މަސައްކަތް އެމްއޭސީއެލްއާ ހަވާލުކޮށްފި އެވެ.
އެ މަސައްކަތްތައް ފެއްޓެވީ ރައީސް ޑރ. މުހައްމަދު މުއިއްޒު ހދ. އަށް މިހާރު ކުރައްވާ ދަތުރުފުޅުގައި މިއަދު އެ ރަށަށް ވަޑައިގެން ބޭއްވެވި ރަސްމިއްޔާތުގަ އެވެ.
ކުޅުދުއްފުށީގެ މަގު ހެދުމުގެ ތިންވަނަ ފިޔަވަހީގެ އަމަލީ މަސައްކަތް ފައްޓަވައިދެއްވީ މިނިސްޓްރީ އޮފް ކޮންސްޓްރަކްޝަން އެންޑް ހައުސިން އިންފްރާންސްޓަރަކްޗާގެ ސްޓޭޓް މިނިސްޓަރު ހަސަން ރަޝީދާއި އާރްޑީސީގެ މެނޭޖިން ޑިރެކްޓަރު އިބްރާހިމް ނަޒީމް އެވެ.
އެއާޕޯޓުގައި އިތުރު ހިދުމަތްތައް ތަރައްގީ ކުރުމާއި އާ ޓާމިނަލްގެ ބިންގާ އަޅުއްވައިދެއްވީ ފިނޭންސް މިނިސްޓަރު މޫސާ ޒަމީރާއި އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފެވެ.
އޭގެ އިތުރުން އެ ރަށުގައި ވަނީ ޕޯޓު ހިދުމަތް ފުޅާ ކުރުމުގެ މަސައްކަތް ވެސް މިއަދު ފަށައިފަ އެވެ.
އެ މަސައްކަތް ފައްޓަވައިދެއްވީ އިކޮނޮމިކް މިނިސްޓަރު މުހައްމަދު ސައީދެވެ.