ރައީސް ޑރ. މުހައްމަދު މުއިއްޒު ވެރިކަމާ ހަވާލުވެ ވަޑައިގަތްއިރު، އިސްލާމިކް މިނިސްޓްރީން ދައްކަން ޖެހިފައި އޮތް 27 މިލިއަން ރުފިޔާގެ ދަރަނި އަދާކޮށްފައިވާ ކަމަށް އަދި ހުއްޓިފައިވާ މަޝްރޫއުތައް އަލުން ފަށާފައިވާ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ވަޒީރުންގެ ޕަބްލިކް ފޯރަމްގައި ވާހަކަދައްކަވަމުން ޝަހީމް ވިދާޅުވީ، އިގްތިސޯދީ ދަތިކަމުގެ ތެރޭގައި ވެސް މި ދަރަނި އަދާކުރުމަށް ރައީސް މުއިއްޒުގެ ވެރިކަމުގެ ފުރަތަމަ ދެ ހަފްތާ ތެރޭގައި ފައިސާ ހަމަޖައްސައި ދެއްވި ކަމަށެވެ.
"މިހާރު މިވަނީ މި 27 މިލިއަން ރުފިޔާގެ ދަރަނި ފިލުވާލާފައި. މ،ިއީ ކިހާ ބޮޑު ކަމެއްތޯ. މިއޮތް އިގްތިސޯދީ ދަތިކަމުގެ ތެރޭގައި،" ޝަހީމް ވިދާޅުވި އެވެ.
ޝަހީމް ވިދާޅުވީ ރަށްރަށުގައި މިސްކިތްތައް ބިނާކުރުމަށް ހިންގަމުން އަންނަ މަޝްރޫއުތައް ފައިސާ ނުލިބުމުގެ ސަބަބުން ހުއްޓިފައި ހުރި މަޝްރޫއުތައް މިހާރު އަލުން ފެށިފައިވާ ކަމަށާއި ލަސްތަކެއް ނުވެ އެ ހިދުމަތް ލިބިގެން ދާނެ ކަމަށެވެ.
ވެރިކަމަށް އައިރު ރާއްޖޭގެ އެކި ހިސާބުތަކުގައި ގާއިމްކޮށްފައިވާ އިސްލާމިކް ސެންޓަރުތައް ވެސް ހުރީ ބޭނުން ނުކުރެވި ވީރާނާވާން ދޫކޮށްލާފައި ކަމަށާއި މި ސަރުކާރުން އެ ތަންތަނުގެ ބޭނުން ހިފޭނެ ގޮތް ހަދައި، އިސްލާމިކް ޔުނިވާސިޓީގެ މަރުކަޒުތައް އެތަންތަނުގައި ގާއިމްކޮށްފައިވާ ކަމަށް ޝަހީމް ވިދާޅުވި އެވެ.
ޝަހީމް ވިދާޅުވީ އޭގެ ސަބަބުން ރަށުގައި ހުރެގެން އިސްލާމީ މަތީ ތައުލީމު ހާސިލްކުރުމުގެ ފުރުސަތު އެތައް ބަޔަކަށް ފަހިވެފައިވާ ކަމަށެވެ.