ދިރިއުޅޭ އާބާދީ ކިތައްމެ މަދުވިޔަސް، ފ. ދަރަނބޫދޫގައި މި ހުޅުވީ އެންމެ ރީތި އެއް ބަނދަރެވެ. މި ސަރަހައްދުގެ ރަށެއްގައި ހުޅުވި އެންމެ ބޮޑު އެއް ބަނދަރު ވެސް މެ އެވެ.
މި ރަށު މީހުން ބުނަނީ މިއީ އެތައް އަހަރެއްވީ، ބޮޑު ތަކުލީފެއްގެ ނިމުން ކަމަށެވެ. އެހެންވެ، ރައީސް އިބްރާހިމް މުހައްމަދު ސޯލިހަށް މަރުހަބާ އާއި ޝުކުރު އަދާކުރުމަށް، އާބާދީގައި 600 އެއްހާ މީހުން ދިރިއުޅޭ މި ރަށުގެ އެންމެހެން ތިބީ ބަނދަރަށް ނުކުމެވެ. އެ އެންމެންގެ މޫނުމަތިން ވެސް ފެނުނީ ހިތްހަމަޖެހުމާއި އުފާވެރިކަމެވެ.
އެމްޓީސީސީއާ ހަވާލުކޮށްގެން، ދައުލަތުގެ ބަޖެޓުން 40.4 މިލިއަން ރުފިޔާ ހަރަދުކޮށް، މި ބަނދަރުގެ މަސައްކަތް ނިންމާލީ މިދިޔަ އަހަރު ކުރީކޮޅުގަ އެވެ. ރައީސް ފ. އަތޮޅަށް މިހާރު ކުރައްވާ ދަތުރުފުޅުގައި މި ބަނދަރު ރަސްމީކޮށް ހުޅުއްވައިދެއްވީ އެވެ.
މި ބަނދަރު ހުޅުވުމުގެ ގޮތުން ދަރަނބޫދޫގައި ބޭއްވި ރަސްމިއްޔާތުގައި ރަށު ކައުންސިލްގެ ރައީސް އަބްދުލްހަލީމް އާދަމް ވިދާޅުވީ، ސިޔާސީ ގޮތުން ނުފޫޒުގަދަ އެއްވެސް މީހެއް ނެތް ރަށަކަށް މި ސަރުކާރުން މިފަދަ ބޮޑު މަޝްރޫއެއް ހިންގައިދިނުމަކީ ރައްޔިތުން ވަރަށް ބޮޑަށް ބަލައިގަންނަ ކަމެއް ކަމަށެވެ. އަދި މިއީ އެއްވެސް ރަށެއް ރައީސް ބާކީނުކުރައްވާނެ ކަން ޔަގީންވާ ކަމެއް ކަމަށް އޭނާ ވިދާޅުވި އެވެ.
"ރައްޔިތުން އުއްމީދުކުރި ވަރަށް ވުރެ ފުރިހަމަ ބަނދަރެއް ހެދިގެން މި ދިޔައީ،" އޭނާ ވިދާޅުވި އެވެ.
މި ރަސްމިއްޔާތުގައި ރައީސް ވިދާޅުވީ 2018 ވަނަ އަހަރުގެ ރިޔާސީ ކެމްޕެއިނަށް ދަރަނބޫދުއަށް ވަޑައިގެންނެވީ ވަރަށް ވިއްސާރަ، ކަނޑުގަދަ ދުވަހެއްގައި ކަމަށެވެ. އޭރު މި ރަށުގައި ރަނގަޅު ބަނދަރެއް ނެތުމުން ރަށަށް އަރައި ފޭބުމުގައި ރައްޔިތުން އުފުލާ ތަކުލީފު އިހުސާސްކުރެއްވުނު ކަމަށެވެ. އެހެންވެ، އެފަހަރު ރިޔާސީ ކެމްޕެއިންގައި މި ރަށުގައި ބަނދަރެއް އަޅައިދޭން ވައުދުވެވަޑައިގެންނެވި ކަމަށް އެމަނިކުފާނު ވިދާޅުވި އެވެ.
"މި ރަށަށް ވަންނަ އަޅުގަނޑުމެން [2018 ވަނަ އަހަރު] ގަޑިއެއްހާއިރު މަޑުކުރަން ޖެހުނު. އެހެން ނަމަވެސް، އެ ދުވަހު ވެސް މި ރަށު ރައްޔިތުން ބަނދަރުމަތީގައި މަޑުކޮށްގެން ތިބި،" ރައީސް ވިދާޅުވި އެވެ.
"އެންމެ ބޮޑު ކަމަކަށް އެ ދުވަހު ވެސް ހުށަހެޅީ ބަނދަރު."
އެ ދުވަހު ވެވަޑައިގެންނެވި ވައުދު ފުއްދާދެވުމުން ވަރަށް ބޮޑު އުފަލެއް ލިބިވަޑައިގެންފި ކަމަށް ރައީސް ވިދާޅުވި އެވެ.
މި ރަށުގައި 2008 ވަނަ އަހަރު ހެދި ބަނދަރު ހަނިވުމާއި ފަޅު ތިލަވުމުގެ ސަބަބުން ލަފާފުރުމަށް ބޮޑެތި ދަތިތަކާ ކުރިމަތިލާން ޖެހުނެވެ. ބަނދަރު ކުޑަވުމުގެ ސަބަބުން، މަސްވެރި މި ރަށުގައި، ކަންނެލި މަސްވެރިކަމުގައި ބޭނުންކުރާ ބޮޑެތި ދޯނިތަކާ އަދި ކާބޯތަކެތި އުފުލާ ބޮޑެތި އޮޑިފަހަރަށް ބަނދަރަށް ވަދެނުކުތުމުގައި ދަތިތަކާ ކުރިމަތިވި އެވެ.
މަޝްރޫއުގެ ތަފުސީލު
- 46،000 ކިއުބިކްމީޓަރަށް ބަނދަރު ފުންކޮށް، ބޭރު ތޮށި ލައި އެއްގަމު ތޮށި ލާފައިވޭ.
- 140 މީޓަރުގެ ސަރަހައްދެއްގައި ރިވެޓްމެންޓާއި ގްރޮއިން ޖަހާފައިވޭ.
- 2،641 އަކަމީޓަރުގެ ސަރަހައްދެއްގައި ހާބާ ޕޭވްމަންޓް ހަދާފައިވޭ.
- 11 މީޓަރު ދިގު، 11 މީޓަރު ފުޅާ ރޭމްޕެއް ހަދާފައިވޭ.
- ބޭރު ތޮށިގަނޑު މައްޗަށް އެރުމަށް ބްރިޖެއް ހަދައި ބަނދަރުގައި ބައްތި ހަރުކޮށްފައިވޭ.
މި ރަސްމިއްޔާތުގައި އެމްޓީސީސީގެ އިސްވެރިންނާއި ސަރުކާރުގެ މިނިސްޓަރުން ވެސް ބައިވެރިވެވަޑައިގެންނެވި އެވެ.