ބޮލީވުޑްގެ ތަރި އިމްރާން ހާޝްމީ ސުވައިން ފްލޫ (އެޗްވަންއެންވަން) އަށް ޕޮޒިޓިވް ވެއްޖެ އެވެ.
އިންޑިއާގެ މުމްބާއީގައި މިވަގުތު ހުރި އިމްރާން އެ ބައްޔަށް ޕޮޒިޓިވްވެފައިވާކަން އޭނާގެ ޓީމުން ވަނީ މެޑިކަލް ރިޕޯޓާ އެކު މީޑިއާތަކަށް ކަށަވަރުކޮށްދީފަ އެވެ.
މިވަގުތު އިމްރާން މަސައްކަތްކުރަމުން އަންނަ އޭނާގެ ކުރިއަށް އޮތް ފިލްމު "ގަންމާސްޓާ ޖީނައިން"ގެ މަސައްކަތްތައް އޭނާ ބަލިވުމުގެ ސަބަބުން ވަނީ މެދުކަނޑާލައިފަ އެވެ. އޭނާ ބަލިވީ ވެސް، އަންނަ ނޮވެމްބަރު މަހު ރިލީޒްކުރާ އެ ފިލްމުގެ މަސައްކަތުގައި އުޅެނިކޮށެވެ.
މި އަހަރުގެ މޫސުމީ ވިއްސާރައާ އެކު މުމްބާއީ އާއި ނިއު ދިއްލީ ކަހަލަ ބޮޑެތި ސިޓީތަކުގައި ސުވައިން ފްލޫ އާއި އާންމު ރޯގާތައް ފެތުރުން ވަނީ ވަރަށް ބޮޑަށް އިތުރުވެފައި ކަމަށް ރިޕޯޓްތައް ބުންޏެވެ.
ސުވައިން ފްލޫގައި، ރޯގާގެ ފެށުން އާދައިގެ ރޯގާއަކާ އެއްގޮތްވި ނަމަވެސް، ގަދައަށް ހުން އައުމާއި ނޭވާލާން އުނދަގޫވުމާއި މޭގައި ރިއްސުން ކަހަލަ ނުރައްކާތެރި އަލާމާތްތައް ފެނެ އެވެ.
އިމްރާން ބަލިން ރަނގަޅުވުމަށް ފަރުވާ ހޯދަމުން އަންނައިރު، މިހާރު ސިނަމާތަކުގައި ދައްކަމުން އަންނަ އޭނާގެ އެންމެ ފަހުގެ ފިލްމު "އާވާރާޕަން 2" އަށް ވަނީ ބޮޑު ކާމިޔާބީއެއް ލިބިފަ އެވެ.
ދިޝާ ޕަޓާނީ އާއި ޕޫރަން ގައްބީ އަދި ޝަބާނާ އަޒްމީ ކަހަލަ ތަރިން މުހިންމު ރޯލުތައް ކުޅެފައިވާ އެ ފިލްމަށް ބޮކްސް އޮފީހުގައި ވަނީ 200 ކުރޯޑް ރޫޕީސް އަށް ވުރެ ބޮޑު އާމްދަނީއެއް ލިބިފަ އެވެ.
އެ ފިލްމަކީ 2000 ގެ އަހަރުތަކުގައި ވިޝޭޝް ފިލްމްސް އިން ނެރުނު "މާޑާ" އާއި "ޒަހަރު" އަދި "ގޭންގްސްޓާ" ކަހަލަ ކްރައިމް ތުރިލާ ފިލްމުތަކުގެ ކާމިޔާބީ ހަނދާންކޮށްދޭ، އަދި ބެލުންތެރިންގެ ބޮޑު ތަރުހީބެއް ލިބެމުން އަންނަ ފިލްމެކެވެ.
"އާވާރާޕަން 2"އަކީ 2007 ވަނަ އަހަރު ނުކުތް ކަލްޓް ކްލާސިކް ފިލްމު "އާވާރާޕަން"ގެ ސީކުއެލްއެކެވެ.