މ. ކޮޅުފުށީގައި ރެންޑަމް ސާމްޕަލް ނަގަން ފެށީ އެ ރަށުގެ މީހަކު މާލެ އައިތާ ދެތިން ދުވަސް ތެރޭގައި ކޮވިޑް-19 އަށް ޕޮޒިޓިވްވުމުންނެވެ. މާލެ އަކީ ކޮވިޑް ފެތުރިފައި އޮތް ތަނަކަށް ވިޔަސް، ބަލި ޖެހިފައި ހުރި މީހަކާ ކޮންޓެކްޓުވާތާ ދެތިން ދުވަސް ތެރޭ ބައްޔަށް ޕޮޒިޓިވް ވުމަކީ ނާދިރު ކަމަކަށް ވާތީ ނިންމީ ކޮޅުފުށީގައި ބަލި ފެތުރިފައި އޮތީތޯ ބަލަން އެ ރަށުން ސާމްޕަލް ނަގާށެވެ.
ފުރަތަމަ ނެގި 105 ސާމްޕަލްގެ ނަތީޖާ ލިބުމުން އެނގުނީ ރަށުގައި ބަލި ފެތުރިފައި އޮތްކަމެވެ. އެ ސާމްޕަލްތަކުން ނުވަ ސާމްޕަލެއް ކޮވިޑް ޕޮޒިޓިވް އެވެ. މިއީ މިކަހަލަ މިގޮތަށް ކޮމިއުނިޓީ ސްޕްރެޑެއް ފެނުނު ފުރަތަމަ ރަށެވެ.
ކައުންސިލާއި އާއްމުންގެ ވެސް ކަންބޮޑުވުމަކީ ބަލި ފެތުރު ގޮތެއް ނޭނގުމެވެ.
އެޗްޕީއޭގެ އިރުޝާދުތަކާ އެއްގޮތަށް އެ ރަށުގައި ވެސް އައީ ބަލިން ރައްކާތެރިވުމުގެ ހުރިހާ ފިޔަވަޅުތަކެއް އަޅައި އަމަލުކުރަމުންނެވެ. މާލެ އިން ދާ މީހުން ގަވާއިދުން ކަރަންޓީން ކުރެ އެވެ. އާއްމުންގެ ތެރެއަށް އެ މީހަކު ނުކުންނަނީ ޕީސީއާރު ޓެސްޓް ނެގެޓިވްވުމުން ކަން ކައުންސިލުން ކަށަވަރު ކުރި އެވެ.
އެ ރަށުގައި ކަރަންޓީންވި އެއްވެސް މީހަކު މުއްދަތު ފުރިހަމަ ނުކޮށް ބޭރު ތެރޭގައި އުޅުނު ކަމުގެ ޝަކުވާއެއް ކައުންސިލަކަށް ނުލިބެ އެވެ.
ގާތްގަނޑަކަށް 1،400 ގެ އާބާދީއެއް އޮންނަ ރަށުގެ ކައުންސިލް ރައީސް ހުސެއިން ޝާމިލް "މިހާރު"އަށް ވިދާޅުވީ ކޮޅުފުށީގައި ބަލި ފެތުރުނު ގޮތް އެޗްޕީއޭ އިން ބަލަން ފަށާފައިވާ ކަމަށެވެ. އެ ރަށުގައި އަދިވެސް އަންނަނީ ސާމްޕަލް ނަގައި ޓެސްޓް ކުރަމުންނެވެ.
އެހެން ރަށެއްގައި ބަލި ފެތުރިފައި؟
ރައްކާތެރިކަމުގެ ފިޔަވަޅުތަކަށް އަމަލުކުރަމުން އައިސްފައި ވާތީ، މާލެ ނުވަތަ ކޮވިޑް އުޅުނު އެހެން ރަށަކުން ކޮޅުފުއްޓަށް ދިޔަ މީހެއްގެ ފަރާތުން އެ ރަށަށް ބަލި ފެތުރުމަށް އޮތް ފުރުސަތު ހަންޏެވެ. އެހެންވެ ބޮޑަށް ލަފާކުރެވޭ އެއްގޮތަކީ އެ ރަށުގެ މީހުން އާއްމުކޮށް ދަތުރުކުރި ރަށެއްގައި ބަލި ފެތުރިފައި ވުމެވެ.
ކޮވިޑު ނެތް ރަށަކަށް ދަތުރުކޮށްފައި އެނބުރި އައިސް ކަރަންޓީންވާކަށް ނުޖެހެ އެވެ.
ކައުންސިލުން ބުނި ގޮތުގައި މާލޭގައި ކޮމިއުނިޓީ ސްޕްރެޑް އޮތުމުން ކޮޅުފުށީ ރައްޔިތުން ބެލީ ކޮންމެހެން ދާން ޖެހިގެން ނޫން ގޮތަކަށް ދަތުރުތައް ނުކުރުމަށެވެ. އެހެންވެ ބޭސްފަރުވާ އަށް ގޮސް އުޅުނީ އެ އަތޮޅު މުއްޔާއި ލ. ގަމު ހޮސްޕިޓަލަށް ކަމަށް ކައުންސިލްގެ ރައީސް ވިދާޅުވި އެވެ.
"އަތޮޅުގެ އެކި ރަށްތަކަށް ވެސް އެކި ބޭނުންތަކުގައި މި ރަށުގެ މީހުން ދިޔަ. އެކަމަކު އެއިން އެއްވެސް ރަށެއްގައި މިހާތަނަށް ބަލި ފެތުރިފައެއް ނުވޭ،" ޝާމިލް ވިދާޅުވި އެވެ.
ކައުންސިލާއި އެ ރަށުގެ ޓާސްކްފޯސް އިން ބުނިގޮތުގައި ރަށުގެ އާއްމު ހާލަތު ރަނގަޅެވެ. ކާބޯތަކެއްޗާއި ބޭސްފަރުވާގައި އަދި މާސްކާއި ސެނިޓައިޒާ ލިބުން ފަދަ ކަމެއްގައި އަދި ދަތިކަމެއް ނޫޅެ އެވެ. އާއްމުން ރަށު ތެރެއަށް ނުކުމެ އުޅެނީ ޒަރޫރީ ބޭނުންތަކުގައި އެކަންޏެވެ.
ވީ ގޮތެއް ނޭނގި ކޮޅުފުށީގައި ބަލި ފެތުރުމަކީ އެހެން ރަށްތަކުގައި ވެސް ބަލި ފެތުރިފައި އޮވެދާނެ ކަމަށް ބަލަންޖެހޭ ސަބަބެކެވެ. ކޮންމެ ރަށެއްގައި ވެސް ރައްކާތެރިކަމުގެ ފިޔަވަޅުތަކަށް އަމަލުކުރަންޖެހޭ ކަމުގެ އިންޒާރެކެވެ.