ސޮނީ ސްޕޯޓްސްއިން ކޮންސިއޭޖް ގްރޫޕާއި ހައިޕް ޖިމް ގުޅިގެން “ސްޓެޕް އަޕް ޗެލެންޖް”ގެ ނަމުގައި ހާއްސަ ފިޓްނަސް ޗެލެންޖެއް ލޯންޗުކޮށްފި އެވެ.
އެއް މަސް ދުވަހުގެ މުއްދަތުގެ މި ޗެލެންޖަކީ އަގުހުރި އިނާމުތަކެއް ހުށަހަޅައި، ކުރިއަށް ގެންދާ ޗެލެންޖެކެވެ. މިއީ އާއްމުންގެ މެދުގައި ހަރަކާތްތެރިވެ އުޅުމަށް ހިތްވަރުދީ، ކަސްރަތުކުރުމަށް ބާރުއަޅާ ޗެލެންޖެކެވެ. މި މަހުގެ ފަސް ވަނަ ދުވަހު ފެށި މި ޗެލެންޖު އަންނަ އޭޕްރިލް މަހުގެ 5 ވަނަ ދުވަހުގެ ނިޔަލަށް ކުރިއަށް ދާނެ އެވެ.
މި ޗެލެންޖުގައި 30 ދުވަހުގެ މުއްދަތެއްގެ ތެރޭގައި 50 ކިލޯމީޓަރު ފުރިހަމަކުރުމަށް ވަނީ ހުޅުވާލާފަ އެވެ. މިއީ ޖޮގްކޮށްގެން ނުވަތަ ހިނގައިގެން ނުވަތަ ދުވެގެން ފުރިހަމަ ކުރެވިދާނެ 50 ކިލޯމީޓަރެވެ. މި ޗެލެންޖުގައި ޑިސްޓެންސް ޓްރެކްކުރާނީ ސްޓްރާވާ މެދުވެރިކޮށް ސޮނީ ސްޕޯޓްސްގެ އެޕުންނެވެ.
މި ޗެލެންޖު އަންނަ މަހު ނިމުމުން، ޗެލެންޖުގެ ބައިވެރިން އިވެލުއޭޓްކުރުމަށް ފަހު، އެންމެ މޮޅު 10 ބައިވެރިން މި ޗެލެންޖުގެ ދެ ވަނަ ފޭސްކަމަށްވާ “ހައިޕް ގޭމްސް”ގައި ބައިވެރިވެވޭނެ އެވެ. މިއީ ސްޓެޕްއަޕް ޗެލެންޖުގެ ވާދަވެރި ފިނާލޭ އެވެ. “ހައިޕް ގޭމްސް”ތަކުގެ ތެރޭގައި ހިމެނޭނީ ބައިވެރިންގެ ބުންވަރާއި ބާރު ހުރި މިންވަރު ވަޒަންކޮށް، މީހާގެ މެންޓަލް ރެޒިލިއަންސް ޓެސްޓުކުރެވޭނެ ފަދަ ފިޓްނަސް ޗެލެންޖުތަކެކެވެ.
ސްޓެޕްއަޕް ޗެލެންޖުގެ ވަނަތައް ހޮވާނީ ‘ހައިޕް ގޭމްސް’ގައި އެންމެ މޮޅަށް ޕާފޯމްކުރާ ފަރާތްތަކުގެ މެދުގަ އެވެ. އެގޮތުން އެއް ވަނަ ދެވަނަ އަދި ތިން ވަނަ ހޮވާ މި ޗެލެންޖުގައި އެންމެ ބޮޑު އިނާމަކަށް، އެއް ވަނައަށް ދާ ފަރާތަކަށް ހުށަހަޅާފައި ވަނީ ބާލީ، ކުއަލަލަމްޕޫރު، ޖަކާޓާ، ބެންކޮކް ނުވަތަ ހަނޯއީގެ ތެރެއިން ބޭނުން އެއް މަންޒިލަކަށް ދެ މީހުންގެ ދެކޮޅު ޓިކެޓެވެ. މިއީ ބަޓިކް އެއާގެ ރާއްޖޭގެ ޖެނެރަލް ސޭލްސް އެޖެންޓު، ކޮންސިއަަޖް ގްރޫޕުން ހުށަހަޅާފައިވާ އިނާމެކެވެ. މި ޗެލެންޖުގެ ދެ ވަނަ އަށް ހުށަހަޅާފައި ވަނީ ސޮނީ ސްޕޯޓްސްގެ 5،000ރ. ގެ ގިފްޓް ވައުޗަރެކެވެ. އަދި ތިން ވަނައަށް ހުށަހަޅާފައި ވަނީ ހައިޕް ޖިމްގެ އެއް އަހަރު ދުވަހުގެ ޖިމް މެމްބާޝިޕެވެ.
ސޮނީ ސްޕޯޓްސް އަކީ އާއްމުންގެ މެދުގައި ހަރަކާތްތެރިވެ އުޅުމަށް ހިތްވަރުދީ، ދުޅަހެޔޮ މުޖުތަމައުއެއް ބިނާކުރުމަށް ކަސްރަތާއި އެކި ކުޅިވަރުތައް ޕްރޮމޯޓުކުރާ ކުންފުންޏެކެވެ.