އުރީދޫ މޯލްޑިވްސްއިން އެމްއެންޑީއެފްއަށް ޑައިވިން އިކުއިޕްމަންޓް ހަދިޔާކޮށްފި އެވެ.
ބަންޑާރަ ކޮށީގައި މިދިޔަ އަންގާރަ ދުވަހު ބޭއްވި ހާއްސަ ރަސްމިއްޔާތެއްގައި އެ ތަކެތި ޑިފެންސް މިނިސްޓަރު ގައްސާން މައުމޫން އާ ހަވާލު ކުރެއްވީ އުރީދޫގެ މެނޭޖިން ޑިރެކްޓަރު ހާލިދު އަލްހަމާދީ އެވެ.
އެ ކުންފުނިން ހަދިޔާކުރި ޑައިވިން އިކުއިޕްމަންޓްތަކުގެ ތެރޭގައި ހިމެނެނީ އޯޝަން ރީފް އެމް 105 ޑިޖިޓަލް ޑުއަލް ޗެނަލް ކޮމިއުނިކޭޝަން ޑިވައިސް އާއި ލެބް އަންޑަވޯޓާ ލައުޑް ސްޕީކަރާޢި އޯޝަން ރީފް ފުލް ފޭސް މާސްކެވެ. އެ ތަކެއްޗަކީ ޑައިވް ކުރާއިރު މުވާސަލާތުކޮށް ހެދުމުގައި އެހީވެދޭނެ ތަކެއްޗެވެ.
އެއީ ކޯސްޓުގާޑުން ހިންގާ ކަނޑުއަޑީގެ އެކި އޮޕަރޭޝަންތަކުގައި ބޭނުންތެރި އިކުއިޕްމަންޓުތަކެވެ.
އުރީދޫގެ މެނޭޖިން ޑިރެކްޓަރު އަދި ސީއީއޯ ހަމާދީ ވިދާޅުވީ އެ ވަސީލަތްތަކަކީ އެކުންފުނީގެ 20 ވަނަ އަހަރީ ދުވަހާ ގުޅިގެން ބޭއްވި ކަނޑުއަޑީގެ އެންމެ ބޮޑު ޕެނަސް ޑިސްކަޝަންގެ ގިނިސް ވޯލްޑް ރެކޯޑް ހެދުމަށް ބޭއްވި ހަރަކާތުގައި ބޭނުންކުރި އިކުއިޕްމަންޓުތައް ކަމަށެވެ.
އެ އިކުއިޕްމަންޓްތަކާއެކު ކަނޑު އަޑީގެ އޮޕަރޭޝަންތަކަށް އެހީއަކަށް ވެގެންދާނެ ކަމަށް ވިދާޅުވި އެވެ.
އުރީދޫން ހަދިޔާކުރި ތަކެއްޗާ ގުޅޭގޮތުން ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީ ވިދާޅުވީ ކޯސްޓްގާޑުގެ ސާޗް އެންޑް ރެސްކިއު ކެޕޭސިޓީ ވަރުގަދަ ކުރުމަށާއި ކަނޑު އަޑީގެ އޮޕަރޭޝަންތައް ހަރުދަނާ ކުރުމަށް ޒަމާނީ އާލާތްތައް މުހިންމު ކަމަށެވެ. އަދި އެ އިކުއިޕްމަންޓްތަކާއެކު ރާއްޖޭގެ އޮޕަރޭޝަނަލް އިފެކްޓިވިޓީ އަދި މެރިޓައިމް ގޮންޖެހުންތަކަށް ކުރިމަތިލުމުގެ ގާބިލްކަން އިތުރުވެގެންދާނެ ކަމަށް ވެސް އޭނާ ވިދާޅުވި އެވެ.
އުރީދޫން ދަނީ އެކި އިދާރާތަކަށް އެފަދަ އެކި އެހީތައް ފޯރުކޮށްދެމުންނެވެ.