ގައުމީ ބޭންކު، ބޭންކް އޮފް މޯލްޑިވްސް (ބީއެމްއެލް)އިން 2025 ވަނަ އަހަރުގެ ހަތަރުވަނަ ކުއާޓަރުގައި 828.7 މިލިއަން ރުފިޔާގެ ހިންގުމުގެ ފައިދާއަކާއެކު ރެކޯޑް މާލީ ނަތީޖާއެއް ހާސިލްކޮށްފި އެވެ.
ބީއެމްއެލްގެ މިދިޔަ އަހަރުގެ ހަތަރު ވަނަ ކުއާޓަރުގެ މާލީ ހިސާބުތައް ދައްކާ ގޮތުގައި، އެ ބޭންކަށް ސާފު ފައިދާގެ ގޮތުގައި 837.5 މިލިއަން ރުފިޔާ ލިބިފައިވާއިރު މިއީ ތިންވަނަ ކުއާޓަރާ އަޅައިބަލާއިރު 76.2 ޕަސެންޓުގެ ކުރިއެރުމެކެވެ.
މިދިޔަ އަހަރުގެ މާލީ ނަތީޖާތައް ދައްކާގޮތުން ބީއެމްއެލްއަށް ލިބުނު ޖުމްލަ އާމްދަނީ ވަނީ 5.5 ބިލިއަން ރުފިޔާއަށްވުރެ މަތިވެފަ އެވެ. މިއީ 2024 ވަނަ އަހަރާ އަޅައިބަލާއިރު 16.1 ޕަސެންޓުގެ ކުރިއެރުމެކެވެ.
އަދި ޓެކްސްއަށް ކެނޑުމުގެ ކުރިން ލިބުނު ފައިދާ ވަނީ 2024 ވަނަ އަހަރާ އަޅާބަލާއިރު 10 ޕަސެންޓު އިތުރުވެ، ރެކޯޑް އަދަދެއް ކަމަށްވާ 3.2 ބިލިއަން ރުފިޔާއަށް އަރާފަ އެވެ.
ބީއެމްއެލްގެ ޖުމްލަ އެސެޓް 55.7 ބިލިއަން ރުފިޔާއަށް ވުރެ މަތިވެފައިވާއިރު، މިއީ މިދިޔަ އަހަރާ އަޅާ ބަލާއިރު 15 ޕަސެންޓުގެ ކުރިއެރުމެކެވެ.
މިދިޔަ އަހަރުގެ ތެރޭގައި ބޭންކުން ވިޔަފާރިތަކާއި އާންމު ފަރުދުންނަށް 10 ބިލިއަން ރުފިޔާގެ އާ ލޯނު ދޫކޮށްފައި ވެ އެވެ. ބޭންކުގެ ކެޕިޓަލް އަދި ލިކުއިޑިޓީ ރޭޝިއޯ ގާނޫނު ލާޒިމުކުރާ މިންގަނޑަށްވުރެ މަތީގައި ދެމެހެއްޓިފައި ވެ އެވެ.
ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ، މިދިޔަ އަހަރުގެ ފަހު ކުއާޓަރުގެ ނަތީޖާއިން ދައްކުވައިދެނީ ބޭންކުގެ އިސްތިރާޖީ އަމާޒަށް ވާސިލްވެފައިވާކަމާއި އަދި މުވައްޒަފުންނަށް ދޭ އަހުމިއްޔަތުކަން ކަމަށެވެ.
"ބޭންކުގެ މައިގަނޑު ވިޔަފާރީގެ ދާއިރާތަކުން ހޯދި ކުރިއެރުމާއި، ހަރުދަނާ ރިސްކް މެނޭޖްމަންޓެއްގެ ސަބަބުން، ބޭންކުގެ މާލީ ދުޅަހެޔޮކަން ދަމަހައްޓައި ވަރުގަދަ މާލީ ނަތީޖާއެއް ހާސިލްކޮށް ވަރުގަދަ ބެލެންސް ޝީޓެއް ދެމެހެއްޓިފައިވޭ،" ޝަރީފް ވިދާޅުވި އެވެ.
މާލީ ދާއިރާގައި ރައްޔިތުންގެ ބައިވެރިވުން އިތުރުކުރުމާއި ޑިޖިޓަލް ކުރިއެރުންތަކާއި އެކު ގައުމީ ތަރައްގީގެ ރޮނގުން ބީއެމްއެލްއިން މިދިޔަ އަހަރު ވަނީ ގިނަ މަސައްކަތްތަކެއްކޮށް، ވިޔަފާރީގެ ދާއިރާތައް ވެސް ފުޅާކޮށްފަ އެވެ.
މީގެ ތެރޭގައި 'ގްރީން ރިސޯޓް ފައިނޭންސިން' ތައާރަފުކުރުމާއި ހައުސިން މިނިސްޓްރީއާ ގުޅިގެން ފަސް ޕަސެންޓުގެ ކުޑަ އިންޓަރެސްޓެއްގައި'ހިޔާވެހި ފައިނޭންސިން' ދޫކުރަން ފެށުމާއި ގެދޮރު ގަތުމަށް ދޫކުރާ ލޯނުތަކުގެ އިކުއިޓީ ފަސް ޕަސެންޓަށް އަށް ދަށްކުރުމުގެ އިތުރުން ސޯޝަލް ހައުސިން ޔުނިޓުތައް އެޅުމަށް'ބީއެމްއެލް އެފޯޑަބަލް ހޯމް ލީސިން ޕްރައިވެޓް ލިމިޓެޑް' އުފެއްދުން ހިމެނެ އެވެ.
ބީއެމްއެލްގެ ހިދުމަތްތައް މުޅި ރާއްޖެއަށް ފުޅާކުރުމަށް ރ. ދުވާފަރުގައި ބޭންކުގެ 40 ވަނަ ބްރާންޗް ހުޅުވައި، 'މުޅި ރާއްޖެއަށް ބީއެމްއެލް އޭޓީއެމް' މަޝްރޫއު ނިންމުމާއެކު، މީހުން ދިރިއުޅޭ ހުރިހާ ރަށެއްގައި ބޭންކުގެ ހިދުމަތް މިދިޔަ އަހަރުގެ ތެރޭގައި ވަނީ ގާއިމުކޮށްފަ އެވެ.
މީގެއިތުރުން، ޑިޖިޓަލް އަދި ޕޭމަންޓް ހިދުމަތްތަކަށް އައި ކުރިއެރުންތަކުގެ ތެރޭގައި، ހުރިހާ ހިދުމަތަކަށް އޮންލައިންކޮށް އެދެވޭނެ އިންތިޒާމު ހަމަޖެއްސުމާއި، 'ސްވައިޕް' ޑިޖިޓަލް ވޮލެޓާއި، ވިސާ ޕްލެޓިނަމް ޑެބިޓް ކާޑާއި، ވިސާ އިންފިނިޓް ކްރެޑިޓް ކާޑުގެ އިތުރުން އިންޑިއަން ރޫޕީ އަދި ޗައިނީޒް ޔުއާން އެކައުންޓްތައް ތައާރަފުކުރުން ވެސް ހިމެނެ އެވެ.
ވިސާ، އެމެކްސް، އަލީޕޭ+، ވީޝިން ޕޭ، ޔޫނިއަންޕޭ އަދި މާސްޓާކާޑާއެކު މިދިޔަ އަހަރުގެ ތެރޭގައި ބީއެމްއެލްއިން ވަނީ ސްޓްރެޓިޖިކް ޕާޓްނަޝިޕްތަކެއް ގާއިމުކޮށް، ރާއްޖޭގެ ޑިޖިޓަލް ޕޭމަންޓް ނިޒާމު އިތުރަށް ވަރުގަދަކުރުމުގައި އިސް ދައުރެއް އަދާކޮށްފަ އެވެ.
މީގެއިތުރުން، ބީއެމްއެލް ސްޓޫޑަންޓް ކާޑާއި، މަސްވެރިންނަށް ފައިނޭންސް ކުރުމަށް 'މަސްވެރިޔާ ޕޯޓަލް' އާއި، ތިމާވެށި ހިމާޔަތްކުރުމަށް 'އީއެންވީ ޕީއޯއެސް' ޕްރޮޖެކްޓާއެކު އެމެކްސްއާއި ގުޅިގެން 'އެކްސްޕީރިއަންސް މޯލްޑިވްސް' ކެމްޕޭން ފެށުންވެސް މިދިޔަ އަހަރުގެ ތެރޭގައި ހިމެނެ އެވެ.
އަދި ކުދި އަދި މެދު ފަންތީގެ ވިޔަފާރިތަކަށް ދޭ ހިދުމަތްތައް ފުޅާކުރުމަށް އެސްޑީއެފްސީ (މިހާރު އެސްއެމްއީ ޑިޖިޓަލް) ބޭންކުގެ ދަށަށް ގެނައުމާއި، ވިޔަފާރިތަކަށް އެހީތެރިވުމުގެ ގޮތުން މާޗަންޓް ފީ އެއް ޕަސެންޓަށް ކުޑަކުރުމުގެ އިތުރުން، މާލީ ދާއިރާގައި އެންމެންގެ ބައިވެރިވުން އިތުރުކުރުމާއި ޑިޖިޓަލް ބަދަލުތަކަށް ކުރި މަސައްކަތަށް 'ކޯރަސް' އަދި މާސްޓާކާޑުން ވަނީ ބީއެމްއެލްގެ އަގު ވަޒަންކޮށް، އެވޯޑްތައްވެސް ލިބިފަ އެވެ.